തിരുവനന്തപുരം: മെഡിക്കല് കോളേജ് ആശുപത്രിയില് രോഗികള് നിലത്ത് കിടക്കുന്നത് ഒഴിവാക്കാന് തിരക്ക് കൂടുതലുള്ള വിഭാഗങ്ങളില്നിന്ന് രോഗികളെ പുലയനാര് കോട്ട ആശുപത്രിയിലേക്ക് മാറ്റുമെന്ന് ആരോഗ്യ മന്ത്രി കെ മുരളീധരന്. പകര്ച്ച പനി പടര്ന്നു പിടിക്കുന്നത് കണക്കിലെടുത്താണ് തീരുമാനം. 500 ഓളം കിടക്കകള് പുലയനാര് കോട്ട ആശുപത്രിയില് സജ്ജീകരിച്ചിട്ടുണ്ടെന്ന് മന്ത്രി അറിയിച്ചു.
മന്ത്രിയുടെ അദ്ധ്യക്ഷതയില് ചേര്ന്ന ആരോഗ്യവകുപ്പിലെയും മെഡിക്കല് വിദ്യാഭ്യാസ വകുപ്പിലെയും ഉന്നത ഉദ്യോഗസ്ഥരുടെയും ജില്ലയിലെ വിവിധ ആശുപത്രി മേധാവികളുടെയും യോഗത്തിലാണ് തീരുമാനമെടുത്തത്. മഴക്കാലത്ത് പകര്ച്ചപ്പനി കേസുകള് വര്ദ്ധിച്ചാല് രോഗികളെ നിലത്ത് കിടത്തുന്നത് പതിവാണ്. എന്നാല് രോഗികളെ നിലത്ത് കിടത്തുന്നത് ഒഴിവാക്കുമെന്ന ആരോഗ്യവകുപ്പിന്റെ പൊതുനയത്തിന്റെ ഭാഗമായാണ് ഈ തീരുമാനമെന്നും മന്ത്രി കെ.മുരളീധരന് പറഞ്ഞു.
ജനറല് ആശുപത്രിയില് അടിയന്തരമായി ക്യാന്റീന് സജ്ജമാക്കണമെന്ന് ആശുപത്രി അധികൃതരോട് മന്ത്രി നിര്ദ്ദേശിച്ചു. മാസ്റ്റര്പ്ലാന് പ്രവര്ത്തികള് ഇഴഞ്ഞുനീങ്ങുകയാണെന്നും എസ്.പി.വിയെ മാറ്റണമെന്നും യോഗത്തില് ഉദ്യോഗസ്ഥര് ആവശ്യപ്പെട്ടു. ഇതിന്റെ അടിസ്ഥാനത്തില് പ്രവര്ത്തിപരിചയമുള്ള ഏജന്സിയെ എസ്.പി.വിയാക്കി മാസ്റ്റര്പ്ലാന് പ്രവര്ത്തനം വേഗത്തിലാക്കാന് തീരുമാനിച്ചു. ജനറല് ആശുപത്രിയിലെ ബ്ലോക്കില് റാമ്പ് സജ്ജമാക്കുന്നതിനും ചോര്ച്ച പരിഹരിക്കുന്നതിനും ബന്ധപ്പെട്ട ഏജന്സികളുമായി സംസാരിച്ച് പ്രവൃത്തികള് വേഗത്തിലാക്കാന് മന്ത്രി ഉദ്യോഗസ്ഥരെ ചുമതലപ്പെടുത്തി.
