കൊല്ലം: കൊട്ടാരക്കര അമ്പലപ്പുറം വേലംകോണത്ത് മഴയില് വീട് തകര്ന്നതിലുളള മനോവിഷമത്തെ തുടര്ന്ന് ഗൃഹനാഥന് ഹൃദയ സ്തംഭനത്താല് മരിച്ചു. അമ്പലപ്പുറം വേലംകോണം ഐപ്പള്ളിക്കോണം വീട്ടില് ശ്രീധരന്(70) ആണ് മരിച്ചത്.
അന്പത് വര്ഷത്തോളം പഴക്കമുളള ജീര്ണിച്ച വീട് ഏതു നിമിഷവും നിലം പൊത്താവുന്ന സ്ഥിതിയിലായിരുന്നു. മേല്ക്കൂര ദ്രവിച്ച് കുറേഭാഗങ്ങള് നേരത്തെ തകര്ന്നിരുന്നു. കഴിഞ്ഞ ഒരാഴ്ചയായി വീടിന്റെ ഓരോ ഭാഗവും ഇടിഞ്ഞു വീഴുന്ന നില ആയിരുന്നു.ശ്രീധരനും ഭാര്യ സാവിത്രിയും മകള് ശ്രീലതയും മാത്രമായിരുന്നു വീട്ടില് കഴിഞ്ഞിരുന്നത്.
കഴിഞ്ഞ ദിവസം വീടിന്റെ ബാക്കി ഭാഗം കൂടി തകര്ന്ന് വീണു. സംഭവം അറിഞ്ഞ് എത്തിയ
സേവാഭാരതി പ്രവര്ത്തകര് കാണുന്നത് തകര്ന്ന വീട്ടില് പായ വിരിച്ചു വിഷമത്തോടെ കിടക്കുന്ന ശ്രീധരനെയാണ്. തുടര്ന്ന് സേവാഭാരതി സെക്രട്ടറി സുരേഷിന്റെ നേതൃത്വത്തില്
ഏര്പ്പാടാക്കിയ വാടക വീട്ടിലേക്കുള്ള യാത്രക്കിടെ വഴിയില് കുഴഞ്ഞു വീണ ശ്രീധരന് ഒപ്പമുണ്ടായിരുന്നവര് പ്രഥമ ശുശ്രൂഷ നല്കി.എന്നാല് വൈകിട്ടോടെ അസ്വാസ്ഥ്യം കൂടുകയും താലൂക്കാശുപത്രിയിലെത്തിച്ചപ്പോഴേക്കും മരിക്കുകയുമായിരുന്നു.
വാടക വീടിന്റെ താക്കോല് വാങ്ങാനായി ശ്രീധരനെയും കൂട്ടി പുറത്തിറങ്ങിയപ്പോഴാണ് ശ്രീധരന് കിടന്നിരുന്ന സ്ഥലത്തേക്ക് മണ്ഭിത്തി ഇടിഞ്ഞു വീണത്.ഈ സമയം വീട്ടിലുണ്ടായിരുന്ന ഭാര്യ സാവിത്രി പരിക്കേല്ക്കാതെ രക്ഷപെട്ടു.
