മാവേലിക്കര: താലൂക്ക് സഹകരണ ബാങ്കിന്റെ തഴക്കര ശാഖയിലെ നിക്ഷേപകര്ക്കു പണം തിരികെ നല്കുന്നില്ലെന്നാരോപിച്ചു ബിജെപി നിയോജക മണ്ഡലം കമ്മിറ്റിയുടെ നേതൃത്വത്തില് ബാങ്കിന്റെ ഹെഡ് ഓഫീസ് ഉപരോധിച്ചു. ബാങ്ക് ഡയറക്ടര് ബോര്ഡിന്റെ കഴിഞ്ഞ ദിവസത്തെ തീരുമാന പ്രകാരം വിവാഹ ആവശ്യത്തിനുള്ള മൂന്നു ലക്ഷം രൂപാ വീതം വാങ്ങുന്നതിനായി ഇന്നലെ നിക്ഷേപകര് എത്തി. ഇവരോടു ബാങ്കിലെ ചില ജീവനക്കാര് സര്ട്ടിഫിക്കറ്റു സംബന്ധിച്ചു തര്ക്കങ്ങള് ഉന്നയിച്ചു. ഇതോടെ ബിജെപി നിയോജകമണ്ഡലം പ്രസിഡന്റ് വെട്ടിയാര് മണിക്കുട്ടന്, ജനറല് സെക്രട്ടറി അനില് വള്ളികുന്നം എന്നിവരുടെ നേതൃത്വത്തില് പ്രവര്ത്തകര് മുദ്രാവാക്യം വിളികളുമായെത്തി ബാങ്ക് സെക്രട്ടറിയെ ഉപരോധിച്ചു.
നിക്ഷേപകരും ബിജെപി ക്കാര്ക്കൊപ്പം ചേര്ന്നതോടെ വാക്കുതര്ക്കവുമുണ്ടായി. സിഐ: പി.ശ്രീകുമാര്, എസ്ഐ ഇ. അജീബ് എന്നിവരുടെ നേതൃത്വത്തില് പോലീസ് സ്ഥലത്തെത്തി സമരക്കാരുമായി ചര്ച്ച നടത്തി. തുടര്ന്നു എസ്ഐ ഓരോ ഡയറക്ടര് ബോര്ഡ് അംഗങ്ങളേയും ഫോണില് വിളിച്ചു ബാങ്കിലെത്തി തീരുമാനം എടുക്കണമെന്നു നിര്ദ്ദേശിച്ചു. സ്ഥലത്തെത്തിയ ഡയറക്ടര് ബോര്ഡ് അംഗങ്ങളായ കല്ലുമല രാജന്, കുര്യന് പള്ളത്ത്, പി.കെ. മഹേന്ദ്രന്, പൊന്നപ്പന് ചെട്ടിയാര്, അംബികദേവി സുനില്കുമാര്, പി. മോഹന്, സുജ ജോഷ്വാ, അഭിലാഷ് തൂമ്പിനാത്ത് എന്നിവര് യോഗം ചേര്ന്നു മുന്തീരുമാന പ്രകാരം പൈസ നല്കുന്നതിനു സെക്രട്ടറിയോടു ആവശ്യപ്പെട്ടു.
ചെക്കില് പ്രസിഡന്റ് ഒപ്പു വേണമായിരുന്നു. തുടര്ന്ന് സിഐ ബാങ്ക് പ്രസിഡന്റ് കോട്ടപ്പുറത്തു വി.പ്രഭാകരന്പിള്ളയെ ഫോണില് വിളിച്ചു ബാങ്കിലെത്തണമെന്ന് ആവശ്യപ്പെട്ടു. പ്രസിഡന്റ് ബാങ്കിലെത്തി സിഐയുടെ മദ്ധ്യസ്ഥതയില് നടത്തിയ ചര്ച്ചയില് തഴക്കര ശാഖയിലെ നിക്ഷേപകരില് വിവാഹം, ചികിത്സ എന്നീ ആവശ്യങ്ങള്ക്കും, വീടു നിര്മാണം നടക്കുന്നവര്ക്കും വിദേശത്തു പോകാന് വീസ ലഭിച്ചവര്ക്കും അടിയന്തിരമായി മൂന്നു ലക്ഷം രൂപ വീതം നല്കാമെന്നു തീരുമാനിച്ചു. ബോര്ഡ് അംഗങ്ങള് ഒപ്പിട്ടതിനു മിനിട്ട്സിന്റെ പകര്പ്പ് ബിജെപിക്കാര്ക്കു നല്കിയതോടെ സമരം അവസാനിച്ചു. വിവാഹ ആവശ്യങ്ങള്ക്കുള്ളവര്ക്കു അടിയന്തിരമായി ചെക്കു നല്കുകയും ചെയ്തു.
