കണ്ണൂര്: ദൈവത്തിന്റെ സ്വന്തം നാടായ പ്രകൃതിയുടെ അനുഗ്രഹമായിരുന്ന കേരളം ഇന്ന് വരള്ച്ചയിലേക്ക് നീങ്ങുകയാണെന്നും ഇത് അത്യന്തം ആപത്കരമായ സാഹചര്യമാണെന്നും മന്ത്രി രാമചന്ദ്രന് കടന്നപ്പളളി പറഞ്ഞു. കേരള സംസ്ഥാന ഭൂവിനിയോഗ ബോര്ഡ് ഭൂവിനിയോഗാസൂത്രണവും പ്രാദേശിക വികസനവും എന്ന വിഷയത്തില് സംഘടിപ്പിച്ച ഏകദിന സെമിനാര് ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.
മണ്ണ്, ജലം, സസ്യപ്രകൃതി, മൃഗസമ്പത്ത് എന്നിവ സംരക്ഷിക്കുക എന്നതാണ് ഹരിത കേരളത്തിന്റെ പ്രധാന ലക്ഷ്യങ്ങളെന്നും ഇതിന് ജനങ്ങളുടെ പിന്തുണ ആവശ്യമാണെന്നും മന്ത്രി കൂട്ടിച്ചേര്ത്തു. ജലസമൃദ്ധിയേക്കാള് പ്ലാസ്റ്റിക്കിനാല് സമൃദ്ധമായ ചിറക്കല് പുഴ സംരക്ഷിക്കുന്നതിനാവശ്യമായ നടപടികള് കൈകൊണ്ടിട്ടുണ്ടെന്നും മന്ത്രി അറിയിച്ചു. കണ്ണൂര് മേയര് ഇ.പി.ലത അധ്യക്ഷത വഹിച്ച ചടങ്ങില് ജില്ലാ പഞ്ചായത്ത് പ്രസിഡന്റ് കെ.വി.സുമേഷ്, ഭൂവിനിയോഗ കമ്മീഷണര് എ.നിസാമുദ്ദീന്, ദാരിദ്ര്യ ലഘൂകരണ വിഭാഗം പ്രൊജക്ട് ഡയറക്ടര് കെ.എം.രാമകൃഷ്ണന്, ജില്ലാ പ്ലാനിങ് ഓഫീസര് കെ.പ്രകാശന്, ഡെപ്യൂട്ടി കൃഷി ഓഫീസര് ജോബി മാത്യു, സംസ്ഥാന ഭൂവിനിയോഗ ബോര്ഡ് ഡെപ്യൂട്ടി ഡയറക്ടര് ബി അനീഷ് കുമാര്, സംസ്ഥാന ഭൂവിനിയോഗ ബോര്ഡ് സ്പെഷ്യലിസ്റ്റ് കുമരേശന് എസ് തുടങ്ങിയവര് പങ്കെടുത്തു.
ഉദ്ഘാടന ചടങ്ങിന് ശേഷം വിവിധ വിഷയങ്ങളില് ശില്പ്പശാലകളും നടന്നു. ജല സംരക്ഷണ അടിസ്ഥാന പ്രമാണങ്ങള് എന്ന വിഷയത്തില് സംസ്ഥാന ഭൂവിനിയോഗ ബോര്ഡ് ഡെപ്യൂട്ടി ഡയറക്ടര് അരുണ് കുമാര് എസ്, നീര്ത്തട പരിപാലനവും പ്രകൃതി വിഭവ സംരക്ഷണവും എന്ന വിഷയത്തില് മണ്ണ് സംരക്ഷണ ഓഫീസര് വി വി പ്രകാശന്, ആരോഗ്യ സംരക്ഷണത്തിന് ആരോഗ്യമുള്ള മണ്ണ് എന്ന വിഷയത്തില് നീലേശ്വരം ബ്ലോക്ക് കൃഷി അസിസ്റ്റന്റ് ഡയറക്ടര് വീണാറാണി ആര് എന്നിവര് ക്ലാസെടുത്തു.
