കണ്ണൂര്: ബന്ധു നിയമനവിവാദവുമായി ബന്ധപ്പെട്ട് സിപിഎമ്മിന്റെ കണ്ണൂരിലെ സമുന്നത നേതാക്കളിലൊരാളും പാര്ട്ടി കേന്ദ്ര കമ്മിറ്റിയംഗവും എംഎല്എയുമായ ഇ.പി.ജയരാജനെതിരെ വിജിലന്സ് കേസെടുത്തത് സിപിഎമ്മിന്റെ കണ്ണൂര് നേതൃത്വത്തിനേറ്റ കനത്ത തിരിച്ചടി. എല്ലാം ശരിയാകുമെന്ന മോഹനവാഗ്ദാനവുമായി അധികാരത്തിലെത്തിയ പാര്ട്ടിക്ക് ഭരണത്തിലെത്തി ആറുമാസം തികയും മുമ്പേ പേരുദോഷമുണ്ടാക്കിയ ബന്ധുനിയമന വിവാദം ജയരാജന്റെ രാജിയോടെ പരിഹാരമാകുമെന്ന് കരുതിയ പാര്ട്ടി നേതൃത്വം വിജിലന്സിന്റെ പുതിയ നടപടിയോടെ പ്രതിരോധത്തിലായിരിക്കുകയാണ്. ജയരാജന് കേസില് ഒന്നാം പ്രതിയാണെങ്കില് കണ്ണൂര് എംപിയും പാര്ട്ടിയുടെ മറ്റൊരു കേന്ദ്ര കമ്മിറ്റിയംഗവുമായ പി.കെ.ശ്രീമതിയുടെ മകന് സുധീര് നമ്പ്യാര് കേസില് രണ്ടാം പ്രതിയാണ്. ഇത് സിപിഎം കണ്ണൂര് നേതൃത്വത്തിനേറ്റ ഇരട്ട പ്രഹരമായി.
പദവി ദുരുപയോഗം ചെയ്തുവെന്നും ബന്ധുനിയമന വിവാദത്തില് സ്വന്തക്കാരെ നിയമിക്കാന് ഗൂഢാലോചന നടത്തിയതായും പദവി ദുരുപയോഗം ചെയ്തതായും വിജിലന്സ് കണ്ടെത്തിയിട്ടുണ്ട്. ത്വരിതാന്വേഷണം നടത്താന് വിജിലന്സ് നിര്ദ്ദേശിച്ചിരിക്കുകയാണ്. സംസ്ഥാനത്തെ സിപിഎമ്മിനെ നിയന്ത്രിച്ചിരുന്ന കണ്ണൂര് ലോബിയില്പ്പെട്ട സമുന്നത നേതാവിനെതിരെ തന്നെ വിജിലന്സ് കേസെടുത്തതോടെ സിപിഎം നേതൃത്വത്തിന്റെ മൂടുപടം അഴിഞ്ഞുവീണിരിക്കുകയാണ്. അഴിമതിക്കും കൊളളക്കും മറ്റ് പാര്ട്ടിക്കളുടെ ഭരണപരാജയത്തിനുമെതിരെ വാതോരാതെ നാടു മുഴുവന് കളളപ്രചാരണങ്ങള് നടത്തുന്ന പാര്ട്ടി നേതാക്കള് പ്രതിരോധത്തിലായിരിക്കുകയാണ്. പാര്ട്ടി അണികള്ക്കിടയില് പുതിയ സാഹചര്യം വിശദീകരിക്കാനാവാതെ പതറുകയാണ് പാര്ട്ടി നേതൃത്വം.
