തിരുവനന്തപുരം: മാധ്യമപ്രവര്ത്തക ശോഭാവാര്യര് രചിച്ച നവസംരംഭകരുടെ വിജയചരിത്രം പറയുന്ന ഡ്രീം ചേസേഴ്സ് തിരുവനന്തപുരത്ത് മുഖ്യമന്ത്രി പിണറായി വിജയന് പ്രകാശിപ്പിച്ചു. പ്രസ് ക്ലബ്ബില് നടന്ന ചടങ്ങില് മുഖ്യമന്ത്രിയില് നിന്ന് അജിത് ബാലകൃഷ്ണന് ആദ്യപ്രതി ഏറ്റുവാങ്ങി.
അസാമാന്യദൃഢനിശ്ചയമുള്ളവരുടെ ജീവിതവിജയത്തിന്റെ ചരിത്രം കഥാരൂപത്തില് അവതരിപ്പിച്ച ശോഭാവാര്യരെ മുഖ്യമന്ത്രി അഭിനന്ദിച്ചു. പുതുസംരംഭങ്ങള്ക്ക് മുടക്കാന് മൂലധനമില്ലെന്നു പറഞ്ഞ് അലസരായിരിക്കുന്നവര്ക്ക് ഈ കൃതി മികച്ച പാഠപുസ്തകമാണ്. ജീവിതത്തിന്റെ മുന്നോട്ടുള്ള കുതിപ്പിന് ഊര്ജം പകരുന്ന സ്വപ്നങ്ങള് എല്ലാവരുടെയും മനസ്സിലുണ്ടാകും. എന്നാല് അവയെ യാഥാര്ഥ്യമാക്കുക വളരെ ദുഷ്കരമാണ്. അത്തരം ദുഷ്കരസംഭവങ്ങളെ യാഥാര്ഥ്യവത്കരിച്ചതിന്റെ കഥയാണ് ഈ കൃതിയിലുള്ളത്. ബിസിനസ്സും സാമൂഹ്യനന്മയും ഇണക്കികൊണ്ടുപോകുന്നതെങ്ങനെയെന്ന് കൃതി നമുക്ക് പറഞ്ഞുതരുന്നു.
ശാസ്ത്രജ്ഞാനം സംരംഭകത്വത്തിന്റെ സ്വഭാവത്തെ സ്വാധീനിക്കുന്നു. ഇത് എങ്ങനെ പ്രയോജനപ്പെടുത്താമെന്ന് സര്ക്കാരും ഗൗരവമായി ആലോചിക്കുന്നു. സമൂഹത്തിന് പ്രയോജനപ്പെടുന്ന നൂതന ആശയങ്ങള് എന്നും രാഷ്ട്രത്തിന്റെ പുരോഗതിക്ക് കാരണമാകും. ഇതര സംസ്ഥാനങ്ങളെ അപേക്ഷിച്ച് വിദ്യാഭ്യാസത്തില് ഏറെ മുന്നില് നില്ക്കുന്ന കേരളത്തിലെ ചെറുപ്പക്കാരില് വലിയ പ്രതീക്ഷയാണുള്ളത്. ഈ പുസ്തകം അവര്ക്ക് മാതൃകയാണെന്നും മുഖ്യമന്ത്രി കൂട്ടിച്ചേര്ത്തു.
ശോഭാവാര്യര് പുസ്തകപരിചയം നിര്വഹിച്ചു. അജിത് ബാലകൃഷ്ണന്, ബൈജു രവീന്ദ്രന്, പദ്മനാഭന് എന്നിവര് സംസാരിച്ചു.
മാധ്യമപ്രവര്ത്തക ശോഭാവാര്യര് രചിച്ച ഡ്രീം ചേസേഴ്്സിന്റെ പ്രകാശനം മുഖ്യമന്ത്രി പിണറായി വിജയന് അജിത് ബാലകൃഷ്ണനു നല്കി നിര്വ്വഹിക്കുന്നു
