തിരുവനന്തപുരം: ഇടതുമുന്നണി ഭരിക്കുന്ന തിരുവനന്തപുരം നഗരസഭയുടെ മേയര് അഡ്വ വി.കെ. പ്രശാന്ത് ഡിവൈഎഫ്ഐ ലോക്കല് സെക്രട്ടറിയുടെ നിലവാരത്തിലാണെന്ന് ബിജെപി സംസ്ഥാന സെക്രട്ടറി അഡ്വ വി.വി. രാജേഷ്. ജനപ്രതിനിധിയായിട്ടും അതില് നിന്ന് ഉയരാന് മേയര്ക്ക് കഴിയുന്നില്ലെന്നും രാജേഷ് കുറ്റപ്പെടുത്തി. ഒരുവര്ഷം പൂര്ത്തിയാക്കിയ നഗരസഭാ ഭരണം ജനവഞ്ചനയുടെതാണെന്ന് ചൂണ്ടിക്കാട്ടി ബിജെപി കൗണ്സിലര്മാര് നഗരസഭാങ്കണത്തില് സംഘടിപ്പിച്ച ഏകദിന ഉപവാസസമരത്തിന്റെ സമാപനസമ്മേളനത്തില് സംസാരിക്കുകയായിരുന്നു അദ്ദേഹം.
നഗരസഭയുടെ ഭരണം പിഴവുകള് നിറഞ്ഞതാണ്. ഭരണാധികാരികള് മാറ്റം ഉള്ക്കൊള്ളാന് തയ്യാറാകുന്നില്ല. നഗരവികസനം ജനങ്ങളിലെത്തിക്കാന് പ്രതിപക്ഷമായ ബിജെപി ക്രിയാത്മക പിന്തുണ നല്കിയിട്ടും ഇടതുനേതൃത്വത്തിലുള്ള ഭരണത്തിന് ഒന്നുംചെയ്യാന് കഴിയുന്നില്ല. പ്രതിപക്ഷമായ ബിജെപിയുടെ സൗജന്യം ഒന്നുകൊണ്ടു മാത്രമാണ് നഗരസഭയില് ഇടതുഭരണം തുടരുന്നത്. എന്നാല് ഭരണത്തെക്കുറിച്ചുള്ള അജ്ഞതയും രാഷ്ട്രീയതിമിരവും ബാധിച്ച ഇടതുമുന്നണി തമ്മില്ത്തല്ലുകയാണ്. തലസ്ഥാനനഗരത്തിന്റെ വികസനത്തിന് കോടികളുടെ ഫണ്ട് അനുവദിക്കാന് കേന്ദ്രസര്ക്കാര് ഒരുക്കമാണ്. പക്ഷേ അത് നേടിയെടുക്കുന്നതില് മേയറും ഭരണസമിതിയും വന് പരാജയമാണ്. ഗതികെട്ട മേയര് മുസ്ലിംലീഗിന്റെ സഹായത്തോടെയാണ് കൗണ്സില് നടത്തിക്കൊണ്ടു പോകുന്നത്. ഇടതുമുന്നണിയുടെ നെറികെട്ട ഭരണത്തിനെതിരെ ബിജെപി 100 വാര്ഡുകളിലും ശക്തമായ പ്രക്ഷേഭ പരിപാടികള് ആവിഷ്കരിക്കുമെന്നും രാജേഷ് മുന്നറിയിപ്പു നല്കി.
പൊട്ടിപ്പൊളിഞ്ഞ നഗരവീഥികള് എത്രയും വേഗം പുനര്നിര്മിക്കുക, നഗരത്തിലെമ്പാടും കൂമ്പാരമായിരിക്കുന്ന മാലിന്യം നിര്മാര്ജനം ചെയ്യുക, തെരുവുവിളക്കുകള് കത്തിക്കുക, തെരുവുനായ്ക്കളുടെ ആക്രമണഭീഷണിയില് നിന്ന് ജനങ്ങളെ രക്ഷിക്കുക, കുടിവെള്ള ദൗര്ലഭ്യം പരിഹരിക്കുക, അട്ടിമറിച്ച ക്ഷേമപെന്ഷനുകള് പുനസ്ഥാപിച്ച് യഥാസമയം അര്ഹര്ക്ക് ലഭ്യമാക്കുക, നികുതിപിരിവിലെ അലംഭാവം ഉപേക്ഷിക്കുക, ജീവനക്കാരുടെ കൈക്കൂലി അവസാനിപ്പിക്കുക, കൗണ്സിലര്മാരോട് മേയര് പുലര്ത്തുന്ന രാഷ്ട്രീയവിവേചനം ഇല്ലാതാക്കുക, താത്കാലിക നിയമനം അവസാനിപ്പിച്ച റിക്രൂട്ട്മെന്റ് പിഎസ്സിക്ക് വിടുക തുടങ്ങിയ ആവശ്യങ്ങളുന്നയിച്ചായിരുന്നു ബിജെപി കൗണ്സിലര്മാര് ഏകദിന ഉപവാസം സംഘടിപ്പിച്ചത്.
തിരുവനന്തപുരം നഗരസഭയിലെ ബിജെപി കൗണ്സിലര്മാര് നടത്തിയ ഏകദിന ഉപവാസസമരം ബിജെപി സംസ്ഥാന സെക്രട്ടറി അഡ്വ വി.വി. രാജേഷ് പ്രതിപക്ഷ നേതാവ് ഗിരികുമാറിന് നാരങ്ങാനീര് നല്കി അവസാനിപ്പിക്കുന്നു
