ഇരിട്ടി: മുഴക്കുന്ന് പഞ്ചായത്തിലെ വിളക്കോട് പാറക്കണ്ടത്ത് ഗൃഹനാഥനടക്കം ഒരു കുടുംബത്തിലെ മൂന്നുപേരെ തൂങ്ങി മരിച്ച നിലയില് കണ്ടെത്തി. വലിയവളപ്പില് ഹൗസില് അലോറ സദാനന്ദന് (48), ഭാര്യ ശ്രീജ (40), മകള് വിളക്കോട് ഗവ.സ്കൂള് എഴാം ക്ലാസ് വിദ്യാര്ഥിനി അനുനന്ദ എന്നിവരെയാണ് വീടിനകത്തെ കിടപ്പുമുറിയില് തൂങ്ങിമരിച്ച നിലയില് കണ്ടെത്തിയത്. മരിച്ച സദാനന്ദന് ടാപ്പിംഗ് തൊഴിലാളിയാണ്. രാവിലെ ടാപ്പിങ്ങിനായി പോയ സദാനന്ദന് ടാപ്പിംഗ് കഴിഞ്ഞു തിരിച്ചുവന്ന ശേഷമാണു കുടുംബത്തോടൊപ്പം ആത്മഹത്യ ചെയതതെന്നു കരുതുന്നു. ഉച്ചക്ക് 12മണിയോടെ വീട്ടിലെത്തിയ സദാനന്ദന്റെ ഒരു ബന്ധു പുറത്തു മൂന്നുപേരുടെയും ചെരുപ്പ് കാണുകയും ആരെയും പുറത്തു കാണാഞ്ഞതിനെത്തുടര്ന്നു സംശയം തോന്നി നോക്കിയപ്പോള് വാതില് ഉള്ളില് നിന്നും പൂട്ടിയ നിലയില് കണ്ടെത്തുകയായിരുന്നു. നാട്ടുകാരെ വിവരമറിയിച്ച ശേഷം വാതില് പൊളിച്ചാണ് അകത്തുകയറിയത്. മൂന്നു പേരും കിടപ്പ് മുറിയിലെ കഴുക്കോലില് കയര്കെട്ടി തൂങ്ങിമരിച്ച നിലയിലായിരുന്നു. ഇവര്ക്ക് ആഖിന എന്ന ഒരു മകള് കൂടിയുണ്ട് .
ഇരിട്ടിയിലെ ഒരു സമാന്തര വിദ്യാഭ്യാസ സ്ഥാപനത്തില് ഡിഗ്രി വിദ്യാര്ഥിനിയായ ആഖിന ക്ലാസ്സില് പോയതിനു ശേഷമാണു ഇവര് ആത്മഹത്യ ചെയ്തതായി കരുതുന്നത്. ഇരിട്ടി ഡിവൈഎസ്പി പ്രജീഷ് തോട്ടത്തില്, മുഴക്കുന്ന് എസ് ഐ കെ.എ.ഫിലിപ്പ് അടക്കമുള്ള പോലീസ് സംഘം സ്ഥലത്ത് എത്തി. വിശദ പരിശോധനകള്ക്ക് ശേഷം ആത്മഹത്യാക്കുറിപ്പ് കണ്ടെടുത്തെങ്കിലും ‘അതില് ഞാന് പോകുന്നു എനിക്ക് മടുത്തു’ എന്ന് എഴുതിയതായി പോലീസ് പറഞ്ഞു. മറ്റു കാരണങ്ങള് ഒന്നും വ്യക്തമല്ലെന്നും അന്വേഷണം നടക്കുന്നതായും പോലീസ് പറഞ്ഞു. വലിയ വളപ്പില് ഗോവിന്ദന്-പരേതയായ ദേവി ദമ്പതികളുടെ മകനാണ്. സദാനന്ദന്. ദിവാകരന്, ശാന്ത, കാഞ്ചന, സരസ്വതി, ശ്രീജ, റോജ, ദിലീപന് എന്നിവര് സഹോദരങ്ങളാണ്. ചെറിയക്കടവന് വീട്ടില് പരേതനായ നാണു കൗസല്യദമ്പതികളുടെ മകളാണ് ശ്രീജ. സതി, ലക്ഷ്മി, ഷീബ, ഗോപാലന്, രഞ്ജിത്ത് എന്നിവര് സഹോദരങ്ങളാണ്.
