കോഴിക്കോട്: എല്ഡിഎഫ് നടത്തിയ ചങ്ങലക്കായി നഗരത്തിലെ ഗതാഗതം തിരിച്ചുവിട്ട് ജനങ്ങളെ വട്ടം കറക്കിയത് മണിക്കൂറുകള്. വൈകിട്ട് നാലു മണിക്ക് നടക്കുമെന്നറിയിച്ച ചങ്ങലക്കായി ഉച്ചക്ക് ഒരുമണി മുതല് തന്നെ നഗരത്തിലെ ഗതാഗതം തിരിച്ചുവിട്ടിരുന്നു. ചങ്ങല നടന്നത് വൈകിട്ട് അഞ്ചോടെയായിരുന്നു. ജില്ലാതല ഉദ്ഘാടനം നടന്ന പ്രസ് ക്ലബ് പരിസരത്തെ വേദി തന്നെ നടപ്പാത കയ്യേറിയാണ് നിര്മ്മിച്ചത്. ഇവിടെ ഏറെ സമയം ഗതാഗതം തടസ്സപ്പെടുകയും ചെയ്തു.
തൃശൂര്, പാലക്കാട്, മഞ്ചേരി, മലപ്പുറം ബാഗത്ത് നിന്നു വന്ന കെഎസ്ആര്ടിസി , സ്വകാര്യ ബസ്സുകള് എന്നിവ ബൈപ്പാസ്, ഹൈലൈറ്റ് മാള്, പാലാഴി റോഡ് ജംഗ്ഷന്, പൊറ്റമ്മല്, അരയിടത്ത്പാലം വഴി ബസ് സ്റ്റാന്റില് പ്രവേശിക്കുകയായിരുന്നു. തിരിച്ച് ആ ഭാഗത്തേക്ക് പോകേണ്ട വാഹനങ്ങള് രാജാജി റോഡ്, തൊണ്ടയാട്, ഹൈലൈറ്റ് മാള് വഴിയും തിരിച്ചുവിട്ടു. മീഞ്ചന്ത, കല്ലായ്, റെയില്വേ സ്റ്റേഷന് ഭാഗങ്ങളിലേക്ക് എത്തേണ്ടിയിരുന്ന യാത്രക്കാര്ക്ക് കൂടുതല് ബുദ്ധിമുട്ടാണ് ഇതുകാരണം ഉണ്ടായത്.
വയനാട്, താമരശ്ശേരി ഭാഗത്തു നിന്നു വന്ന കെഎസ്ആര്ടിസി , സ്വകാര്യ ബസ്സുകള് എന്നിവ കുന്ദമംഗലം, കാരന്തൂര്, വെള്ളിമാട്കുന്ന്, മലാപ്പറമ്പ്, തൊണ്ടയാട് വഴിയാണ് ബസ് സ്റ്റാന്റില് പ്രവേശിച്ചത്. ഈ ബസ്സുകള് തിരിച്ച് അരയിടത്ത്പാലം, മെഡിക്കല് കോളജ്, കാരന്തൂര്, കുന്ദമംഗലം വഴി തിരിച്ചു വിട്ടു.
ജില്ലയുടെ വടക്ക് ഭാഗത്ത് നിന്നും വന്ന കെഎസ്ആര്ടിസി സ്വകാര്യ ബസ്സുകള്, പൂളാടിക്കുന്ന്, വേങ്ങേരി, മലാപ്പറമ്പ്, തൊണ്ടയാട് വഴിയാണ് സ്റ്റാന്റില് പ്രവേശിച്ചത്. ഈ ബസ്സുകള് തിരിച്ച് അരടിയത്ത് പാലം, എരഞ്ഞിപ്പാലം, മലാപ്പറമ്പ്, വേങ്ങേരി, പൂളാടിക്കുന്ന് വഴിയാണ് തിരിച്ചുപോയത്.
അതേസമയം ജില്ലയിലെ മലയോര മേഖലയിലും ഉള്പ്രദേശങ്ങളിലും ബസ്സുകള് ട്രിപ്പ് കട്ട് ചെയ്തത് കാരണം യാത്രക്കാര് വലയുകയും ചെയ്തു.
വടകര: എല്ഡിഎഫ് സംഘടിപ്പിച്ച മനുഷ്യ ചങ്ങലയുടെ പേരില് ജനം മണിക്കൂറുകളോളം ബുദ്ധിമുട്ടി. ബസ് ഇല്ലാതായതാണ് പ്രയാസമനുഭവിക്കാന് കാരണം. ചങ്ങലയില് കണ്ണികളാകാനുള്ളവരെ എത്തിക്കാന് സ്വകാര്യ ബസുകളില് ഭൂരിപക്ഷവും ഓട്ടം പോയതാണ് യാത്രക്കാര്ക്ക് ബുദ്ധിമുട്ടായത്.
ഇന്നലെ രണ്ട് മണി മുതല് വടകര ഇരു സ്റ്റാന്റുകളിലും യാത്രക്കാരുടെ പ്രവാഹമായിരുന്നു. വടകര നിന്ന് ഉള്ഭാഗത്തേക്ക് ബസ് സര്വ്വീസ് പൂര്ണ്ണമായി നിലച്ച മട്ടായിരുന്നു. പല ദിക്കുകളില് നിന്നെത്തിയ സ്ത്രീകള് ഉള്പ്പെടെയുള്ള യാത്രക്കാര് നെട്ടോട്ടമായിരുന്നു.
പണം നിരോധിച്ച പ്രയാസത്തിന് പുറമെ അതിനനതിരെയുള്ള സമരവും ജനത്തിന് ദുരിതമാകുകയായിരുന്നു.
