കാട്ടാക്കട: നെയ്യാര്ഡാം ഇറിഗേഷനില് അസിസ്റ്റന്റ് എഞ്ചിനീയറെ നിയമിച്ചു. നെയ്യാര് ഡാമില് അസിസ്റ്റന്റ് എഞ്ചിനീയര് തസ്തിക ഒഴിഞ്ഞു കിടക്കുന്നതായി കഴിഞ്ഞ ദിവസം ‘ജന്മഭൂമി’ റിപ്പോര്ട്ട് ചെയ്തിരുന്നു. നെയ്യാര്ഡാമിലെ പ്രവര്ത്തനം അവതാളത്തില് എന്ന വാര്ത്ത അധികൃതരുടെ ശ്രദ്ധയില്പ്പെട്ടതിനെ തുടര്ന്നാണ് നടപടി.നെയ്യാര്ഡാമില് വിനോദ് പി.എസ് നെയാണ് പുതിയ എഇയായി അടിയന്തിരമായി നിയമിച്ചത്. നെയ്യാറ്റിന്കര എഇ ക്രിസ്തുദാസിനായിരുന്നു മാസങ്ങളായി ഇവിടെ അധിക ചുമതല നല്കിയിരുന്നത്. ഇറിഗേഷന് ആന്റ് അഡ്മിനിസ്ട്രേഷന് ചീഫ് ഓഫീസില് നിന്ന് ഇക്കഴിഞ്ഞ 15 നാണ് ഇത് സംബന്ധിച്ച് ഉത്തരവിറങ്ങിയത്.
നാലുമാസമായി നെയ്യാര്ഡാം ഇറിഗേഷന് വകുപ്പ് ഓഫീസില് എഇ ഇല്ലാത്തതു കാരണം ഇവിടുത്തെ പ്രവര്ത്തനങ്ങള് അവതാളത്തിലായിരുന്നു. ദൈനംദിന ജോലികളും കനാല്, പാലം ഉള്പ്പടെയുള്ളവയുടെ നവീകരണ പ്രവര്ത്തനങ്ങളും ഇതോടെ മുടങ്ങിക്കിടക്കുകയായിരുന്നു. സ്വതന്ത്ര ചുമതല ആവശ്യമുള്ള നെയ്യാര് ഇറിഗേഷന് പദ്ധതി പ്രദേശത്തെ പ്രവര്ത്തനങ്ങള് കാര്യക്ഷമമായി നടക്കാത്തത് വലിയ പ്രതിഷേധങ്ങള്ക്ക് കാരണമായി. നെയ്യാറ്റിന്കര, പാറശാല, നെയ്യാര്ഡാം എന്നിവിടങ്ങളില് ഒരു എഇയുടെ കീഴിലെ മേല്നോട്ടം ആയതിനാലാണ് ദൈനദിന പ്രവര്ത്തനങ്ങള് താറുമാറായത്. പുതിയ എഇയെ നിയമിച്ചതോടെ പ്രശ്നങ്ങള്ക്ക് പരിഹാരമാകുമെന്നതാണ് പ്രദേശവാസികളുടെയും സാമൂഹ്യപ്രവര്ത്തകരുടെയും കണക്കുകൂട്ടല്.
