കോട്ടയം: പൂവന്തുരുത്ത് ശ്രീകൃഷ്ണ സ്വാമി ക്ഷേത്രത്തിന് നേരെ സാമൂഹ്യ വിരുദ്ധരുടെ കല്ലേറ്. കല്ലേറില് ക്ഷേത്രത്തിന്റെ ഓഫീസ് മുറിയുടെ ചില്ലുകള് തകര്ന്നു. കഴിഞ്ഞ ദിവസം വൈകിട്ടാണ് സംഭവം നടന്നത്. പൂവന്തുരുത്ത് ജ്യോതി പൗര്ണമി സംഘത്തിന്റെ ഉടമസ്ഥതയില് സ്ത്രീകള് മാത്രമാണ് ഭരണസമിതി അംഗങ്ങളായിട്ടുള്ളത്.
ക്ഷേത്രത്തില് മണ്ഡല മഹോത്സവത്തോടനുബന്ധിച്ച് വൈകിട്ട് സ്ത്രീകള് നടത്തിയ ഈശ്വര ഭജനയ്ക്കു നേരെയും ക്ഷേത്രത്തിന് നേരെയുമാണ് സാമൂഹ്യ വിരുദ്ധര് അക്രമം നടത്തിയത്. ഇക്കാര്യത്തില് വേണ്ട അടിയന്തിര നിയമ നടപടി കൈക്കൊള്ളണമെന്ന് ആവശ്യപ്പെട്ട് ഭരണസമിതി പോലീസില് പരാതി നല്കിയിട്ടും പ്രതികള്ക്ക് അനുകൂലമായ നടപടിയാണ് പോലീസ് ഉദ്യോഗസ്ഥര് സ്വീകരിക്കുന്നത്. ഇതിനാല് ഭരണ സമിതിയും ഭക്തജനങ്ങളും ആശങ്കയിലാണ്. അടിയന്തിരമായി വേണ്ട നടപടികള് ബന്ധപ്പെട്ടവരില് നിന്നുണ്ടാകണമെന്നാണ് ഭരണസമിതി ആവശ്യപ്പെടുന്നത്.
അടിയന്തിരമായി പ്രശ്നപരിഹാരമുണ്ടായില്ലെങ്കില് ഹൈന്ദവ സംഘടനകള് ചേര്ന്ന് പ്രത്യക്ഷ സമര പരിപാടികള് നടത്തുമെന്ന് ക്ഷേത്ര ഭരണസമിതി അറിയിച്ചു. തുടര് പരിപാടികള് ആലോചിക്കുന്നതിനായി ഇന്ന് വൈകിട്ട് 4ന് ക്ഷേത്രത്തില് പ്രസിഡന്റ് പ്രസന്നകുമാരിയുടെ അദ്ധ്യക്ഷതയില് ഭക്തജന യോഗം ചേരും.
