ന്യൂദല്ഹി: ഖത്തര് പ്രധാനമന്ത്രി ശൈഖ് അബ്ദുല്ല ബിന് നാസര് ബിന് ഖലീഫ് അല്താനിയുടെ ഇന്ത്യ സന്ദര്ശനത്തോടനുബന്ധിച്ച് രൂപീകരിച്ച സംയുക്ത ബിസിനസ് കൗണ്സില് ഇന്ത്യ ഖത്തര് ബന്ധം കൂടുതല് ദൃഢമാക്കാന് സഹായകമാകുമെന്നു വിലയിരുത്തല്. ഇന്ത്യന് ഖത്തറി വ്യവസായ സമൂഹത്തിനായി ദല്ഹിയിലെ ഖത്തര് സ്ഥാനപതി കാര്യാലയം നല്കിയ വിരുന്നു സല്ക്കാരത്തിലാണ് ബിസിനസ് കൗണ്സില് രൂപീകരിച്ചതായി ഖത്തര് പ്രധാനമന്ത്രി പ്രഖ്യാപിച്ചത്.
ഖത്തറിലെ വികസന പദ്ധതികളിലും വ്യാപാരമേഖലയിലും സ്വകാര്യ പങ്കാളിത്തം വര്ധിപ്പിക്കുമെന്നും ഇതിനായി കൂടുതല് വിദേശ മൂലധനം ആകര്ഷിക്കുമെന്നും ശൈഖ് അബ്ദുല്ല പറഞ്ഞു. വികസന, സാമ്പത്തിക, വ്യാപാര മേഖലകളില് ഖത്തറും ഇന്ത്യയും തമ്മില് സുദൃഢമായ ബന്ധമാണ് നിലനില്ക്കുന്നത്.
ഖത്തര് – ഇന്ത്യ വ്യാപാരബന്ധം കൂടുതല് ഉയരങ്ങളിലേക്ക് എത്തിക്കുന്നതില് അമീര് ശൈഖ്തമീം ബിന് ഹമദ് അല്താനി പ്രത്യേകശ്രദ്ധ നല്കുന്നുണ്ട്. ഇതിന്റെ ഫലമായി പൊതുസ്വകാര്യമേഖലകളില് ഇന്ത്യ-ഖത്തര് വ്യാപാര പങ്കാളിത്തം വര്ധിച്ചതായും ശൈഖ് അബ്ദുല്ല ചൂണ്ടിക്കാട്ടി.
വിദേശകാര്യ ജോയന്റ് സെക്രട്ടറി മൃദുല്കുമാര്, ലുലു ഗ്രൂപ്പ് ചെയര്മാന് എം.എ. യൂസഫലി, ഖത്തര് എയര്വേയ്സ് സി.ഇ.ഒ. അക്ബര് അല്ബേക്കര്, ദോഹ ബാങ്ക് സി.ഇ.ഒ. ഡോ. ആര്. സീതാരാമന്, മുഹമ്മദ് ബിന് അബ്ദുല്ല അല്റുമൈഹി, സി.ഐ.ഐ ഡയറക്ടര് ജനറല് ചന്ദ്രജിത് ബാനര്ജി, ഖത്തറിലെ ഇന്ത്യന് സ്ഥാനപതി പി. കുമരന്, ഇന്ത്യയിലെ ഖത്തര് സ്ഥാനപതി എന്നിവരും ചടങ്ങില് പങ്കെടുത്തു.
വാണിജ്യമേഖലയില് വളരെ ഉദാരമായ നയങ്ങളാണ് കേന്ദ്രസര്ക്കാര് സ്വീകരിച്ചുവരുന്നത്. ഇത് ഗള്ഫ് രാജ്യങ്ങളില് നിന്നടക്കം കൂടുതല് നിക്ഷേപം ഇന്ത്യയിലെ വിവിധ മേഖലകളില് എത്താന് സഹായിക്കുമെന്ന് എം.എ. യൂസഫലി ചടങ്ങിനെ അഭിസംബോധന ചെയ്യവേ പറഞ്ഞു. ഇതോടൊപ്പം ഖത്തറിന്റെ വിവിധ മേഖലകളില് നിക്ഷേപം നടത്താന് ഇന്ത്യന് വ്യവസായ സമൂഹത്തിന് വളരെ അനുകൂലമായ അന്തരീക്ഷമാണ് അവിടെ നിലനില്ക്കുന്നത്. ഖത്തര് ഭരണകൂടം മികച്ച പിന്തുണയാണ് വ്യവസായ വാണിജ്യസമൂഹത്തിന് നല്കുന്നത്. കണ്ണൂര് വിമാനത്താവളം പ്രവര്ത്തനസജ്ജമാകുന്നതോടുകൂടി ഖത്തര് എയര്വേയ്സ് ദോഹയില് നിന്ന് സര്വ്വീസ് നടത്തുന്നതിനാവശ്യമായ നടപടികള് സ്വീകരിക്കുവാന് ഖത്തര് എയര്വേസിനോട് അപേക്ഷിച്ചിട്ടുണ്ട്. അതോടൊപ്പം കരിപ്പൂരില്നിന്ന് സര്വ്വീസുകള് പുനരാരംഭിക്കുന്നതിനാവശ്യമായ നടപടികളും ആരംഭിക്കും.
