ചേര്ത്തല: ഇന്ന് ലോക ഭിന്നശേഷി ദിനം. പരിമിതികളിലും പതറാതെ ആര്ദ്ര സ്പെഷല് സ്കൂള്. നഗരസഭയുടെ കീഴില് ഏഴാം വാര്ഡില് പ്രവര്ത്തിക്കുന്ന സ്പെഷല് സ്കൂളാണ് ഭിന്നശേഷിയുള്ള കുട്ടികളുടെ ആശാകേന്ദ്രമായി മാറുന്നത്. അഞ്ച് മുതല് 33 വയസ് വരെയുള്ളവര് ഇവിടെയുണ്ട്. ജീവിതകാലം മുവുവന് വീല്ചെയറില് കഴിയാന് വിധിക്കപ്പെട്ടവരും അച്ഛനമ്മമാരെ പോലും തിരിച്ചറിയാന് കഴിയാത്തവരും ഇവിടെയുണ്ട്. സ്നേഹത്തോടെ കൊഞ്ചിക്കാനും അവരുടെ ആവശ്യങ്ങള് കണ്ടറിഞ്ഞ് ചെയ്യാനും പ്രിന്സിപ്പല് മിനിയുടെ നേതൃത്വത്തിലുള്ള ജീവനക്കാര് ഒപ്പമുണ്ട്. കളിപ്പാട്ടങ്ങളും ആഭരണങ്ങളും നിര്മിക്കുന്നതിനുള്ള പരിശീലനവും നല്കുന്നുണ്ട്. ഇവരുടെ കരവിരുതില് വിരിയുന്ന കളിപ്പാട്ടങ്ങളും ആഭരണങ്ങളും ഉള്പ്പെടുത്തി പ്രദര്ശനം സംഘടിപ്പിക്കാനുള്ള തയാറെടുപ്പിലാണ് സ്കൂള് അധികൃതര്. കുട്ടികളുടെ നേതൃത്വത്തില് സ്കൂള് അങ്കണത്തില് കൃഷിയും ചെയ്യുന്നുണ്ട്. ഭിന്നശേഷിയുള്ളവര്ക്ക് തണലാകുമ്പോഴും പരിമിതികളില് വീര്പ്പുമുട്ടുകയാണ് സ്കൂള്. മൂന്ന് അദ്ധ്യാപകരും, നാല് അനദ്ധ്യാപകരും നാല് വിസിറ്റിങ് സ്റ്റാഫുമുള്പ്പെടെ 11 ജീവനക്കാരാണ് ഇവിടെയുള്ളത്. ഇവര്ക്ക് പ്രാഥമിക കൃത്യങ്ങള് നിര്വഹിക്കുന്നതിനുള്ള സൗകര്യങ്ങള് ഇല്ലാത്ത സ്ഥിതിയാണ്. ഫണ്ടിന്റെ അപര്യാപ്തത മൂലം ശൗചാലയത്തിന്റെ നിര്മാണം പാതിവഴിയില് മുടങ്ങി. സര്ക്കാര് ധനസഹായങ്ങളൊന്നുമില്ലാതെ നഗരസഭയുടെ തുച്ഛമായ ഫണ്ട് ഉപയോഗിച്ചാണ് സ്കൂള് പ്രവര്ത്തിക്കുന്നത്. ജീവനക്കാരുടെ ശമ്പളം ഉള്പ്പെടെയുള്ള ചെലവുകള് കണ്ടെത്തുന്നത് ഈ ഫണ്ടില് നിന്നാണ്. സേവാഭാരതിയുപ്പെടെയുള്ള സന്നദ്ധസംഘടനകള് നല്കുന്ന സഹായങ്ങളാണ് സ്കൂളിനെ മുന്നോട്ട് കൊണ്ടുപോകുന്നത്. വൈകല്യങ്ങളുടെ പേരില് മാറ്റി നിര്ത്തപ്പെടേണ്ടവരല്ലെന്ന് ഓരോ തവണയും നമ്മളെ ഓര്മിപ്പിക്കുകയാണ് ഈ കുട്ടികള്. ബിആര്സിയുടെ നേതൃത്വത്തില് ഭിന്നശേഷി ദിനം ഇത്തവണ കഴിവുത്സവമായി ആഘോഷിക്കുവാനുള്ള തീരുമാനം ഇത്തരം കുട്ടികളുടെ കഴിവുകള് പ്രോല്സാഹിപ്പിക്കുന്നതിനുള്ള വേദിയാകും. നഗരസഭ ടൗണ് ഹാളില് രാവിലെ ഒന്പതിന് ചെയര്മാന് ഐസക് മാടോവന കഴിവുല്സവം ഉദ്ഘാടനം ചെയ്യും. ചിത്രപ്രദര്ശനത്തിന്റെ ഉദ്ഘാടനം അവതാരിക രഞ്ജിനി ഹരിദാസ് നിര്വഹിക്കും. സെറിബ്രല് പാര്സി രോഗബാധിതനായ കാര്ത്തിക് വരച്ച ചിത്രങ്ങളും പ്രദര്ശനത്തിലുണ്ടാകും. മുഹമ്മ പഞ്ചായത്ത് പ്രസിഡന്റ് ജെ. ജയലാല് അദ്ധ്യക്ഷത വഹിക്കും.
ഇന്ന് ലോക ഭിന്നശേഷി ദിനം – പരിമിതികളിലും പതറാതെ ആര്ദ്ര സ്കൂള്
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.