ആലപ്പുഴ: ഈ വര്ഷത്തെ ജില്ലാ കേരളോത്സവം ഡിസംബര് 17, 18 തിയതികളിലായി മുതുകുളം ബ്ലോക്ക് പഞ്ചായത്തില് നടക്കും. കലാകായിക വിഭാഗങ്ങളിലായി 87 ഇനങ്ങളില് മത്സരങ്ങള് അരങ്ങേറും. കലാമത്സരങ്ങള്ക്കായി മാടമ്പില് ഗവണ്മെന്റ് യുപിഎസ് കണ്ടല്ലൂരും കായിക മത്സരങ്ങള്ക്കായി ചേപ്പാട് എന്ടിപിസി ഗ്രൗണ്ടുമാണുള്ളത്. കലാമത്സരങ്ങള് മൂന്നുവേദികളിലായി നടത്തും. ഇതുസംബന്ധിച്ച് വിവിധ സബ്കമ്മറ്റികളുടെ ആലോചനായോഗം മുതുകുളം ബ്ലോക്ക് പഞ്ചായത്തില് നടന്നു.
ജില്ലാ പഞ്ചായത്ത് സെക്രട്ടറി എ. നൗഷാദിന്റെ അധ്യക്ഷതയില് ചേര്ന്ന യോഗത്തില് ജില്ലാ പഞ്ചായത്ത് അംഗങ്ങളായ മണി വിശ്വനാഥ്, സിന്ധുവിനു, മുതുകുളം ബ്ലോക്ക് പഞ്ചായത്ത് വൈസ് പ്രസിഡന്റ് എന്.സോമലത, ബിഡിഒ വി.ആര്. രാജീവ്, യുവജനക്ഷേമവകുപ്പ് ജില്ലാ പ്രോജക്ട് ഓഫീസര് ആര്.എസ്. ചന്ദ്രികാദേവി, ജില്ലാ സ്പോര്ട്ട്സ് കൗണ്സില് സെക്രട്ടറി ജി. സുധീഷ്, അസിസ്റ്റന്റ് ഇന്ഫര്മേഷന് ഓഫീസര് കെ.എസ്. സുമേഷ്, മുതുകുളം ബ്ലോക്ക് പഞ്ചായത്തംഗങ്ങള്, വിവിധ കമ്മറ്റി പ്രതിനിധികള് എന്നിവര് യോഗത്തില് പ്രസംഗിച്ചു. ആയിരത്തി നാനൂറോളം പേര് കേരളോത്സവത്തില് മത്സരങ്ങളില് പങ്കെടുക്കുമെന്നാണ് കരുതുന്നത്.
