കണ്ണൂര്: േലാക ഭിന്നശേഷി ദിനമായ മൂന്നിന് ദിനാഘോഷപരിപാടികളുടെ സംസ്ഥാനതല ഉദ്ഘാടനം കണ്ണൂര് ജൂബിലി ഹാളില് മന്ത്രി കെ.കെ.ശൈലജ നിര്വഹിക്കും. രാവിലെ 10ന് ആരംഭിക്കുന്ന ചടങ്ങില് ജില്ലാ പഞ്ചായത്ത് പ്രസിഡന്റ് കെ.വി.സുമേഷ് അധ്യക്ഷത വഹിക്കും. വിവിധ മേഖലകളില് വ്യക്തിമുദ്ര പതിപ്പിച്ച ഭിന്നശേഷിക്കാര്ക്കുള്ള സംസ്ഥാനതല അവാര്ഡ് വിതരണം മന്ത്രി രാമചന്ദ്രന് കടന്നപ്പള്ളി നിര്വഹിക്കും. ചടങ്ങില് മേയര് ഇ.പി.ലത മുഖ്യപ്രഭാഷണം നടത്തും. ഉദ്ഘാടനച്ചടങ്ങിന് ശേഷം ജൂബിലി ഹാള്, കലക്ടറേറ്റ് ഓഡിറ്റോറിയം, സ്പോര്ട്സ് കൗണ്സില് ഹാള് എന്നിവിടങ്ങളിലായി വിദ്യാര്ത്ഥികളുടെ കലാമല്സരങ്ങള് അരങ്ങേറും.
ഡിസംബര് രണ്ടിന് പോലീസ് പരേഡ് ഗ്രൗണ്ടില് നടക്കുന്ന ഭിന്നശേഷിക്കാരുടെ കായിക മല്സരങ്ങള് രാവിലെ ഒന്പതിന് ജില്ലാ കലക്ടര് മിര് മുഹമ്മദ് അലി ഉദ്ഘാടനം ചെയ്യും. ചടങ്ങില് ജില്ലാ പഞ്ചായത്ത് വൈസ് പ്രസിഡന്റ് പി.പി.ദിവ്യ അധ്യക്ഷത വഹിക്കും. ജില്ലാ സ്പോര്ട്സ് കൗണ്സില് പ്രസിഡന്റ് ഒ.കെ.വിനീഷ് മുഖ്യാതിഥിയാവും.
സോഫ്റ്റ്ബോള് ത്രോ, ഓട്ടം, ഷോട്ട്പുട്ട്, ഡിസ്കസ് ത്രോ, നടത്തം, കസേര കളി, ലോംഗ് ജംപ്, ലമണ്-സ്പൂണ് റെയ്സ് തുടങ്ങിയ ഇനങ്ങളിലാണ് കായിക മല്സരങ്ങള് നടക്കുക. കലാമല്സരങ്ങളുടെ ഭാഗമായി ലളിത ഗാനം, സമൂഹഗാനം, കവിതാപാരായണം, പ്രസംഗം, നാടോടി നൃത്തം, സിംഗ്ള് ഡാന്സ്, സമൂഹ നൃത്തം, പ്രച്ഛന്ന വേഷം, മിമിക്രി, മോണോ ആക്ട്, മൈം, ക്വിസ്, ഓര്മ പരിശോധന തുടങ്ങിയ ഇനങ്ങള് അവതരിപ്പിക്കും. ജില്ലയിലെ സ്കൂളുകളില് നിന്നും ഭിന്നശേഷിക്കാര്ക്കായുള്ള സ്ഥാപനങ്ങളില് നിന്നുമുള്ള വിദ്യാര്ഥികള് പങ്കെടുക്കും. കണ്ണൂര് ജില്ലാ പഞ്ചായത്തും സാമൂഹ്യനീതി വകുപ്പും സംയുക്തമായാണ് പരിപാടികള് സംഘടിപ്പിക്കുന്നത്.
