തിരുവനന്തപുരം: കരമന കളിയിക്കാവിള റോഡ് വികസനത്തിനായി സ്ഥലം ഏറ്റെടുത്തവര്ക്കുള്ള നഷ്ടപരിഹാര വിതരണം ജനുവരിയോടെ പൂര്ത്തിയാകും. പ്രാവച്ചമ്പലം മുതല് കൊടിനട വരെയുള്ള പ്രദേശത്തെ ഭൂവുടമകള്ക്ക് നഷ്ടപരിഹാരം നല്കി സ്ഥലം ഏറ്റെടുക്കല് പൂര്ത്തീകരിച്ചുവരികയാണ്. റോഡരികിലെ താമസക്കാര്, വ്യാപാരികള്, തൊഴിലാളികള് എന്നിവരുടെ പുനരധിവാസ ആനുകൂല്യങ്ങളും ഇതോടൊപ്പം വിതരണം ചെയ്യും. പ്രാവച്ചമ്പലം മുതല് വഴിമുക്ക് വരെയുള്ള സ്ഥലമേറ്റെടുപ്പ് സമയബന്ധിതമായി പൂര്ത്തിയാക്കുമെന്നും ഉദേ്യാഗസ്ഥര് അറിയിച്ചു. കളക്ടര് എസ്. വെങ്കടേസപതിയുടെ അദ്ധ്യക്ഷതയില് ചേര്ന്ന യോഗത്തിലാണ് തീരുമാനം.
ജില്ലയിലെ കുടിവെള്ളക്ഷാമം പരിഹരിക്കുന്നതിന് ജലസ്രോതസ്സുകളുടെ മാലിന്യം നീക്കല്, നവീകരണം, പുതിയ പദ്ധതികളുടെ കമ്മിഷന് തുടങ്ങിയ പ്രവര്ത്തനങ്ങള് ഊര്ജ്ജിതമാക്കും. കിളിമാനൂര്, പഴയകുന്നുമ്മേല്, മടവൂര് ഗ്രാമപഞ്ചായത്തുകള്ക്കായുള്ള സമഗ്ര കുടിവെള്ള പദ്ധതി ജനുവരിയോടെ കമ്മിഷന് ചെയ്യും. നെടുമങ്ങാട് നഗരത്തിലെ ജലവിതരണത്തിനായി വിഭാവനം ചെയ്ത പദ്ധതിയുടെ ജലശുദ്ധീകരണശാലയുടെ നിര്മാണം സംബന്ധിച്ച് വിശദമായ റിപ്പോര്ട്ട് തയ്യാറാക്കി വരികയാണെന്ന് ജലഅതോറിറ്റി ഉദ്യോഗസ്ഥര് അറിയിച്ചു. അരുവിക്കര ഡാമിലെ മാലിന്യം നീക്കം ചെയ്യുന്ന നടപടികളുടെ രണ്ടാംഘട്ടം പുരോഗമിക്കുകയാണെന്നും സ്ഥിരമായി മാലിന്യം നീക്കം ചെയ്യുന്നതിന് ഇറിഗേഷന് വകുപ്പിന്റെ വീഡ് കട്ടര് ലഭ്യമാക്കുന്നതിനുള്ള നടപടികള് സ്വീകരിച്ചുവരികയാണെന്നും അധികൃതര് പറഞ്ഞു.
വെള്ളായണി കായല് പ്രദേശത്തെ കയ്യേറ്റക്കാര്ക്കും കായലില് മാലിന്യം നിക്ഷേപിക്കുന്നതിനുമെതിരെ കര്ശന നടപടി സ്വീകരിക്കുമെന്ന് കളക്ടര് പറഞ്ഞു. കായല് സംരക്ഷണവുമായി ബന്ധപ്പെട്ട് പഞ്ചായത്ത് റവന്യൂ ഉദ്യോഗസ്ഥരുടെയും രാഷ്ട്രീയ പാര്ട്ടികളുടെയും സന്നദ്ധസംഘടനാ പ്രതിനിധികളുടെയും ജനപ്രതിനിധികളുടെയും യോഗം വിളിക്കും. മുതലപ്പൊഴി ഹാര്ബര് ഡ്രെഡ്ജിംങ് നടപടികള് ലാഘവത്തോടെ കാണരുതെന്ന് കളക്ടര് പറഞ്ഞു. ആഴംകൂട്ടാനും കല്ലുകള് നീക്കം ചെയ്യാനുമുള്ള ടെണ്ടര് നടപടികള് പൂര്ത്തിയായിവരികയാണെന്നും പ്രവര്ത്തനം ഉടന് ആരംഭിക്കുമെന്നും ഹാര്ബര് എന്ജിനീയറിംഗ് ഉദേ്യാഗസ്ഥര് പറഞ്ഞു. പൊന്മുടി ഫെസിലിറ്റേഷന് സെന്റര് തുറന്നു പ്രവര്ത്തിപ്പിക്കുന്നതിന് പുനരുദ്ധാരണ പ്രവര്ത്തനങ്ങളടക്കമുള്ള നടപടികള് സ്വീകരിച്ചതായി ഡിറ്റിപിസി സെക്രട്ടറി അറിയിച്ചു.
കളക്ടര് എസ്.വെങ്കടേസപതിയുടെ അധ്യക്ഷതയില് ചേര്ന്ന യോഗത്തില് എംഎല്എമാരായ കെ.ആന്സലന്, ബി.സത്യന്, മറ്റ് എംഎല്എമാരുടെയും എം.പിമാരുടെയും പ്രതിനിധികള്, സബ് കളക്ടര് ദിവ്യാ എസ് അയ്യര്, എഡിഎം ജോണ്.വി.സാമുവല്, ജില്ലാ പ്ലാനിങ് ഓഫീസര് വി.എസ്. ബിജു പങ്കെടുത്തു.
