കണ്ണൂര്: ആള് കേരള ഗോള്ഡ് ആന്റ് സില്വര് മര്ച്ചന്റ്സ് അസോസിയേഷന് ജില്ലാ സമ്മേളനവും ജനറല് ബോഡിയോഗവും നാളെ ചേമ്പര് ഓഫ് കോമേഴ്സ് ഹാളില് നടക്കും. രാവിലെ പത്തിന് കണ്ണൂര് കോര്പ്പറേഷന് മേയര് ഇ.പി.ലത ഉദ്ഘാടനം ചെയ്യുമെന്ന് ഭാരവാഹികള് വാര്ത്താസമ്മേളനത്തില് അറിയിച്ചു. ജില്ലാ പഞ്ചായത്ത് സ്റ്റാന്റിങ്ങ് കമ്മിറ്റി ചെയര്മാന് വി.കെ.സുരേഷ്ബാബു മുഖ്യപ്രഭാഷണം നടത്തും. തുടര്ന്ന് ഗാനമേളയും ഉണ്ടായിരിക്കും.
സമ്മേളനത്തെ തുടര്ന്ന് 24ന് ജില്ലയിലെ സ്വര്ണം-വെള്ള വ്യാപാരസ്ഥാപനങ്ങള് അവധിയിലായിരിക്കും. മുന്നൊരുക്കങ്ങളില്ലാത്ത നോട്ട് അസാധുവാക്കലവിനെ തുടര്ന്ന് കടുത്ത വ്യാപാര-സാമ്പത്തിക പ്രതിസന്ധിയാണ് ഉണ്ടായിരിക്കുന്നത്. സ്വര്ണവ്യാപാര ശാലകളില് നിലവിലുള്ള അഞ്ച് ശതമാനം മാത്രമെ വ്യാപാരം നടക്കുന്നുള്ളു. അതുകൊണ്ട് തന്നെ 2016 ഒക്ടോബര് മാസത്തെ വില്പന നികുതി അടക്കുന്നതിന് 2017 ജനുവരി മാസം വരെ സമയം അനുവദിക്കുക, കോമ്പൗണ്ടിങ്ങ് ചെയ്ത സ്വര്ണ വ്യാപാരികളുടെ വില്പന പരിശോധിച്ച് 2016 നവംബര്, ഡിസംബര് മാസത്തില് കലക്ട് ചെയ്ത നികുതി മാത്രം ഈടാക്കുക, 2016 നവംബര്, ഡിസംബര് മാസങ്ങളിലെ പീടിക മുറികളുടെ വാടക ഒഴിവാക്കുവാന് കെട്ടിട ഉടമകളോട് ആവശ്യപ്പെടുന്ന നടപടികള് സ്വീകരിക്കുക, മുന് വര്ഷങ്ങളില് നികുതിവകുപ്പിന്റെ പരിശോധനയിലും മറ്റും സര്ക്കാരിലേക്ക് പണം അടക്കാനുള്ള വ്യാപാരികള്ക്ക് 2017 മാര്ച്ച് വരെ സാവകാശം നല്കണമെന്നും ഭാരവാഹികള് ആവശ്യപ്പെട്ടു.
വാര്ത്താസമ്മേളനത്തില് അബ്ദുള് അസീസ്, ടി.വി.മനോജ്, എം.ബാലന്, കെ.എം.സ്കറിയാച്ചന് എന്നിവര് പങ്കെടുത്തു.
