കണ്ണൂര്: അഞ്ഞൂറ്, ആയിരം നോട്ടുകള് അസാധുവാക്കിയതിനെ തുടര്ന്ന് ജില്ലയില് കഴിഞ്ഞ ദിവസങ്ങളില് അനുഭവപ്പെട്ട നോട്ട് ക്ഷാമത്തിന് പരിഹാരമാകുന്നു. എന്നാല് ചില്ലറ നോട്ടുകള് കൂടുതല് പണം കൊടുത്ത് കരസ്ഥമാക്കുന്ന നോട്ട് മാഫിയകളുടെ പ്രവര്ത്തനം സജീവമായിട്ടുണ്ട്. പോലീസ് അടക്കമുളള ഉദ്യോഗസ്ഥര് ഇതിനെതിരെ നടപടി സ്വീകരിക്കുന്നില്ലെന്നാണ് പരാതി. സ്വകാര്യ ബസ് കണ്ടക്ടര്മാര്, കെഎസ്ആര്ടിസി ബസ് കണ്ടക്ടര്മാര്, ചില കച്ചവടസ്ഥാപനങ്ങള്, മെഡിക്കല് ഷോപ്പുകള്, പെട്രോള് പമ്പുകള്, മെഡിക്കല് ക്ലിനിക്കുകള് തുടങ്ങി നിരവധി സ്ഥാപനങ്ങള് കേന്ദ്രീകരിച്ച് നോട്ട് മാഫിയകള് നോട്ട് ശേഖരിക്കുന്നുണ്ട്. പത്തു മുതല് 20 വരെ ശതമാനം തുക കൂടുതല് കൊടുത്താണ് ഈ സംഘം നോട്ടുകള് വാങ്ങുന്നത്. ഇത്തരം ചെറിയ നോട്ടുകള് പൂര്ണമായും വിപണിയില് നിന്നും ഉള്വലിയുകയാണ്. ഇതുമൂലം വിപണിയില് ചെറിയ നോട്ടുകള്ക്ക് കടുത്ത ക്ഷാമമാണ് നേരിടുന്നത്. ജില്ലാ ആസ്ഥാനത്തെ ബാങ്കുകളില് യഥേഷ്ടം ചെറിയ നോട്ടുകള് ഉള്പ്പെടെ എത്തിയിട്ടുണ്ടെങ്കിലും ഗ്രാമ പ്രദേശങ്ങളില് ചെറിയ നോട്ടുകള്ക്ക് രൂക്ഷമായ ക്ഷാമമാണ് അനുഭവപ്പെടുന്നത്. മലയോര മേഖലയിലെ എടിഎമ്മുകളാകട്ടെ ആഴ്ചകളായി നോക്കുകുത്തികളായി മാറിയിരിക്കുകയാണ്. എസ്ബിഐ രണ്ടു ദിവസം ജില്ലയില് മൊബൈല് എടിഎം പ്രാവര്ത്തികമാക്കിയിരുന്നുവെങ്കിലും ഇപ്പോള് അത് പ്രവര്ത്തിക്കുന്നില്ല. ചില ബാങ്ക് ജീവനക്കാര് ഇടപാടുകാരെ പരിഭ്രാന്തരാക്കുകയാണ് ചെയ്യുന്നത്. തങ്ങളുടെ പണം അക്കൗണ്ടുകളിലുണ്ടെങ്കിലും എടുക്കാനാവാതെ ദിനംപ്രതി ബാങ്കില് കയറിയിറങ്ങുന്നത് പതിവായിരിക്കുകയാണ്. ബാങ്ക് ഉദ്യോഗസ്ഥര് രാഷ്ട്രീയ കാഴ്ചപ്പാടോടെ പെരുമാറുന്നതാണ് ഇതിന് കാരണം. എന്നാല് തങ്ങളുടെ സ്വന്തം ഇടപാടുകാര്ക്ക് യഥേഷ്ടം പണം നല്കുന്നുമുണ്ട്.
ജില്ലയിലെ നിരവധി സഹകരണ ബാങ്കുകളില് ആദായനികുതി അധികൃതര് പരിശോധന നടത്തിയതായാണ് സൂചന. ബാങ്കുകളിലെ ഡെയ്ലി ഡിപ്പോസിറ്റര്മാര് പണം പിരിവ് തുടങ്ങിയിട്ടില്ല. സഹകരണ ബാങ്കുകള്ക്ക് അനുകൂലമായ നിലപാട് കേന്ദ്രസര്ക്കാര് അടുത്ത ദിവസം സ്വീകരിക്കുമെന്നാണ് അറിയുന്നത്. ഇതോടുകൂടി സഹകരണ മേഖലയും സജീവമാകും. ഇതോടെ നോട്ടുക്ഷാമം ഇല്ലാതാകും. ജില്ലയിലെ തെരഞ്ഞെടുത്ത പെട്രോള് പമ്പുകളില് നിന്നും നോട്ടുകള് മാറ്റി നല്കാനുള്ള സംവിധാനവും ഉടന് വരുമെന്നാണ് അറിയുന്നത്. ഇതോടൊപ്പം ഡല്ഹിയിലും മറ്റ് സംസ്ഥാനങ്ങളിലും നടപ്പിലാക്കിയിട്ടുള്ള പോസ്റ്റ് ഓഫീവ് വഴിയുള്ള പണം മാറ്റി നല്കല് പദ്ധതിയും കേരളത്തില് ഉടന് നിലവില് വരും. കോണ്ഗ്രസ്സ്-സിപിഎം സഹകരണമുന്നണി നോട്ട് അസാധുവാക്കല് നടപടിക്കെതിരെ വ്യാപകമായി പ്രചാരണം നടത്തുന്നുണ്ടെങ്കിലും സാമ്പത്തിക വിദഗ്ധരും ഒട്ടേറെ പ്രമുഖരും ഇതിനെ അനുകൂലിച്ച് ഫേസ് ബുക്കിലും മറ്റും പ്രതികരണം നല്കിയത് ജനങ്ങളില് പ്രതീക്ഷ നല്കുന്നുണ്ട്.
