വാഷിംഗ്ടണ്: അധികാരത്തിലേറി ആദ്യ ദിനം തന്നെ ട്രാന്സ് -പസഫിക് വ്യാപാര പങ്കാളിത്തത്തില് നിന്ന് പിന്മാറുമെന്ന് നിയുക്ത പ്രസിഡന്റ് ഡൊണാള്ഡ് ട്രംപ്. നമ്മുടെ തൊഴിലുകള് തിരിച്ച് പിടിക്കുന്നതിനും നിയമങ്ങള് പുനഃസ്ഥാപിക്കുന്നതിനും വേണ്ടി ആദ്യ ദിവസം തന്നെ ചെയ്യാവുന്ന നടപടികളുടെ പട്ടിക തയാറാക്കാന് തന്റെ സംഘത്തോട് നിര്ദേശിച്ചതായും ട്രംപ് വ്യക്തമാക്കി.
ആദ്യ നൂറ് ദിവസം മുന്ഗണന നല്കേണ്ട വിഷയങ്ങളുടെ രൂപരേഖയും ട്രംപ് തയാറാക്കിയെന്നാണ് സൂചന. അമേരിക്കയ്ക്ക് ദുരന്തമായ ട്രാന്സ് -പസഫിക് വാണിജ്യ കരാറില് നിന്ന് പിന്മാറുകയാണ് ആദ്യ നടപടി. ബാരക് ഒബാമയാണ് ഈ കരാറില് ഒപ്പിട്ടിരിക്കുന്നത്. ഇതിന് പകരം തൊഴിലും വ്യവസായവും നമ്മുടെ രാജ്യത്തേക്ക് തിരികെ കൊണ്ടുവരുന്ന ഉഭയകക്ഷി കരാറുകള്ക്ക് രൂപം നല്കും. നോര്ത്ത് അമേരിക്കന് സ്വതന്ത്ര വാണിജ്യ കരാറും പുനഃപരിശോധിക്കും.
അമേരിക്കയെ ഒന്നാമതെത്തിക്കുക എന്ന ലളിതമായ സുപ്രധാന തത്വമാണ് തന്റേത്. അതേസമയം ട്രാന്സ് -പസഫിക് വാണിജ്യ കരാറുകള് റദ്ദാക്കുന്നത് തന്ത്രപരമായും സാമ്പത്തികമായും രാജ്യത്തിന് വലിയ ബാധ്യതയാകുമെന്ന് അമേരിക്കന് വാണിജ്യ പ്രതിനിധി മുഖായേല് ഫ്രൊമാന് മുന്നറിയിപ്പ് നല്കിയിട്ടുണ്ട്. ജനുവരി 20ന് അധികാരമേല്ക്കുമ്പോള് ഇല്ലാതാക്കേണ്ട ആറ് വിഷങ്ങളില് ട്രംപ് പരമപ്രധാനമെന്ന് കരുതുന്ന ഒന്നാണ് ടിപിപി.
