കണ്ണൂര്: അഞ്ഞൂറ് ആയിരം നോട്ടുകള് അസാധുവാക്കിയിതിനെ തുടര്ന്ന് ജില്ലയില് നേരിട്ട കറന്സി ക്ഷാമത്തിന് പരിഹാരം കണ്ടുതുടങ്ങി. ജില്ലയിലെ വിവിധ ബാങ്ക് ശാഖകളിലൂടെ ഇന്നലെ കോടിക്കണക്കിന് രൂപയാണ് ഇടപാടുകാര്ക്ക് വിതരണം ചെയ്തത്. ഇതിനുപുറമെ എസ്ബിഐയുടെ നേതൃത്വത്തില് സഞ്ചരിക്കുന്ന എടിഎം വഴി ആയിരക്കണക്കിന് ആള്ക്കാര് പണം പിന്വലിച്ചു. അഞ്ഞൂറ് രൂപ നോട്ട് ജില്ലയില് ഇന്ന് എത്തിത്തുടങ്ങും. ജില്ലയിലെ എടിഎം മെഷീനുകളില് അഞ്ഞൂറ് രൂപ നോട്ടുകള് ഇന്നുമുതല് ലഭ്യമാകും. നൂറ്, അമ്പത് നോട്ടുകള് നിറച്ച എടിഎം മെഷിനുകളില് പണം പെട്ടെന്ന് തീരുന്നുണ്ടെങ്കിലും ബാങ്കുകള് പ്രത്യേക താല്പര്യമെടുത്ത് പണം നിറക്കുന്നതുമൂലം ഇന്നലെ ഇടപാടുകാര്ക്ക് കൂടുതല് ബുദ്ധിമുട്ടുകള് അനുഭവപ്പെട്ടിട്ടില്ല. എസ്ബിഐയുടെ സഞ്ചരിക്കുന്ന എടിഎം ഇന്നലെ മുതലാണ് പ്രവര്ത്തനമാരംഭിച്ചത്. ഇന്ന് ഈ സംവിധാനം പയ്യന്നൂര്, കൂത്തുപറമ്പ് ഭാഗങ്ങളില് കേമ്പ് ചെയ്ത് പണം വിതരണം ചെയ്യും.
എടിഎം കാര്ഡുകള് പ്രത്യേക വാഹനത്തിലെ കമ്പ്യൂട്ടറില് പരിശോധിച്ച് അക്കൗണ്ടില് ആവശ്യമായ പണം ഉണ്ടെങ്കില് തുക നേരിട്ട് നല്കുന്ന സംവിധാനമാണ് ഇതിലുള്ളത്. വളരെ കുറച്ച് സമയം കൊണ്ട് ഒരാള്ക്ക് പണം ലഭ്യമാകും. വരും ദിവസങ്ങളില് ജില്ലയുടെ മലോര മേഖലകളിലും ഈ സംവിധാനം എത്തിപ്പെടും. കൂടുതല് മെഷീനുകള് ലഭ്യമല്ലാത്തതും ഇപ്പോള് ബാങ്കുകളില് അനുഭവപ്പെടുന്ന തിരക്കു മൂലം ജീവനക്കാരെ പിന്വലിക്കാന് കഴിയാത്തതുമാണ് സംവിധാനം വിപുലീകരിക്കാന് സാധിക്കാത്തത്.
വിവാഹാവശ്യത്തിന് രണ്ടര ലക്ഷം രൂപ വരെ പിന്വലിക്കാന് അനുവാദം നല്കിയതും കര്ഷകര്ക്ക് അമ്പതിനായിരം രൂപവരെ പിന്വലിക്കാനുള്ളഅനുവാദം നല്കിയതും മലയോര മേഖലയുള്ളവര്ക്ക് ഏറെ അനുഗ്രഹമായിട്ടുണ്ട്.
ചില ബാങ്കുകളില് രണ്ടായിരം രൂപ മാത്രമേ ലഭ്യമാകുന്നുള്ളൂ എന്നതും ജനങ്ങള്ക്ക് ദുരിതമായിട്ടുണ്ട്. ചിലകേന്ദ്രങ്ങള് വ്യാജ പ്രചരണങ്ങള് നടത്തുന്നത് വ്യാപാരികള്ക്കിടയിലും പൊതുജനങ്ങള്ക്കിടയിലും പരിഭ്രാന്തിയുളവാക്കിയിട്ടുണ്ട്. ആദായ നികുതി അധികൃതര് കടകളില് കയറി പഴയ അഞ്ഞൂറ് ആയിരം രൂപ നോട്ടുകള് പിടിച്ചെടുക്കുന്നു എന്ന വ്യാജ പ്രചരണമാണ് ചില കേന്ദ്രങ്ങള് നടത്തുന്നത്. എന്നാല് ആദായ നികുതി അധികൃതര് കള്ളപ്പണക്കാരെ കണ്ടെത്താന് കര്ശ്ശന നടപടികള് തുടങ്ങിയതോടെ ഇതിനെ തടയിടാന് വ്യാജ പ്രചരണങ്ങള് അഴിച്ചുവിടുകയാണ് ചിലര്
