നേര്വഴിയേ: പ്രധാനമന്ത്രി നരേന്ദ്ര മോദി ജപ്പാനില് കവസാക്കി ഹെവി ഇന്ഡസ്ട്രീസിന്റെ കോബെയിലെ പ്ലാന്റില് ബുള്ളറ്റ് ട്രെയിനിന്റെ ഡ്രൈവര് സീറ്റില്. ജപ്പാന് പ്രധാനമന്ത്രി ഷിന്സോ ആബെ സമീപം
കോബെ (ജപ്പാന്): കണക്കിലില്ലാത്ത പണം കണ്ടാല് സ്വാതന്ത്ര്യം കിട്ടിയകാലം മുതലുള്ള രേഖകള് പരിശോധിക്കുമെന്നും കള്ളപ്പണം കണ്ടെത്താന് കൂടുതല് നടപടിയുണ്ടാകുമെന്നും പ്രധാനമന്ത്രി നരേന്ദ്ര മോദി. ആരെയും വിടില്ല, സത്യസന്ധര്ക്ക് പ്രശ്നമുണ്ടാവില്ല: ജപ്പാനിലെ ഇന്ത്യന് സമൂഹം നല്കിയ സ്വീകരണത്തില് മോദി പറഞ്ഞു.
”അസാധുവാക്കിയ നോട്ട് ബാങ്കില് നിക്ഷേപിക്കാനുള്ള സമയം ഡിസംബര് 30 ന് കഴിഞ്ഞാല് പുതിയ നപടികള് ഉണ്ടാകില്ലെന്നു പറയാനാവില്ല. കണക്കില് പെടാത്തതു കണ്ടാല് സ്വാതന്ത്ര്യലബ്ധി മുതലുള്ള രേഖകള് പരിശോധിക്കും. അതിന് എത്രപേരെ വേണമെങ്കിലും വിന്യസിക്കും. സത്യസന്ധര്ക്ക് പ്രശ്നമുണ്ടാവില്ല. ആരെയും വെറുതേവിടില്ല. എന്നെ അറിയാവുന്നവര് ബുദ്ധിശാലികളുമാണ്. അവര്ക്കറിയാം, ബാങ്കില് നിക്ഷേപിക്കുന്നതിനേക്കാള് നല്ലത് ഗംഗയില് ഒഴുക്കുന്നതാണെന്ന്,” മോദി പറഞ്ഞു. 500, 1000 നോട്ടുകള് ഗംഗയില് ഒഴുകുന്നുവെന്ന റിപ്പോര്ട്ട് പരാമര്ശിക്കുകയായിരന്നു അദ്ദേഹം.
നോട്ട് അസാധുവാക്കല് മറ്റൊരു ”സ്വച്ഛ് ഭാരത് യജ്ഞ”മാണെന്ന് വിശേഷിപ്പിച്ച മോദി, ഈ സുപ്രധാന തീരുമാനത്തിനൊപ്പം നിന്ന ജനത്തെ പ്രശംസിച്ചു. ”നാലും ആറും മണിക്കൂര് വരി നിന്ന് അവര് ദേശീയ താല്പര്യത്തില് സഹകരിച്ചു. 2011 ലെ സുനാമിക്കു ശേഷം ജപ്പാന് ജനത കാണിച്ച വികാരം പോലെയാണിത്.”
”ഏറെ, ആഴത്തില് ആലോചിച്ച്, പ്രശ്നസാധ്യതകളെല്ലാം ചിന്തിച്ചാണ് തീരുമാനമെടുത്തതും പെട്ടെന്ന് പ്രഖ്യാപിച്ചതും. ഇത്രയേറെ പിന്തുണ കിട്ടുമെന്ന് കരുതിയില്ല,” മോദി പറഞ്ഞു.
നിയമം എല്ലാവര്ക്കും ഒരുപോലെയാകാനാണിത് ചെയ്തത്. ഇപ്പോള് അമ്മയെ വൃദ്ധസദനങ്ങളിലാക്കിയ മക്കള് അമ്മയുടെ പേരില് ബാങ്കു നിക്ഷേപം നടത്തുന്നു, മോദി പറഞ്ഞു.
