മക്കളേ, വയറുനിറച്ച് ഭക്ഷണം കഴിക്കരുത്. വയറിന്റെ കാല്‍ഭാഗം എപ്പോഴും ഒഴിച്ചിടണം. ശരിയായ ദഹനത്തിന് ഇത് സഹായിക്കും. ശ്വാസംമുട്ടെ ആഹാരം കഴിച്ചാല്‍, ഹൃദയത്തിന്റെ പ്രവര്‍ത്തനഭാരം വര്‍ധിക്കും.
അമിതഭക്ഷണം സാധനയ്‌ക്ക് മാത്രമല്ല, ആരോഗ്യത്തിനും ദോഷം ചെയ്യും. ഇടയ്‌ക്കിടെ എന്തെങ്കിലും കഴിച്ചുകൊണ്ടിരിക്കുന്ന ശീലം മക്കള്‍ വെടിയണം. ഭക്ഷണകാര്യത്തില്‍ സമയനിഷ്ഠ പാലിക്കുന്നത് ആരോഗ്യത്തിനും, മനോനിയന്ത്രണത്തിനും നല്ലതാണ്. ജീവിക്കുവാന്‍ വേണ്ടി മാത്രം കഴിക്കണം. കഴിക്കുവാന്‍ വേണ്ടി ജീവിക്കരുത്.
ആഴ്ചയില്‍ ഒരു ദിവസം, ഒരു നേരം ആഹാരം കഴിച്ച് വീട്ടിലിരുന്നോ ഗുരുകുലങ്ങളില്‍ പോയോ ജപധ്യാനങ്ങള്‍ നടത്തുന്നത് വളരെ നല്ലതാണ്. ഒരുനേരം ഭക്ഷണം എന്നുള്ളതു മാറ്റി, പൂര്‍ണമായ ഉപവാസം അനുഷ്ഠിക്കുന്നത് സാധനയ്‌ക്കും ആരോഗ്യത്തിനും ഗുണം ചെയ്യും. പൂര്‍ണ ഉപവാസം പറ്റുന്നില്ലെങ്കില്‍, പഴങ്ങള്‍ കഴിച്ചുകൊണ്ടായാലും മതി. വാവ് ഏകാദശി തുടങ്ങിയ ദിവസങ്ങള്‍ ഉപവാസത്തിന് പറ്റിയതാണ്.
സന്ധ്യാസമയത്ത് ഭക്ഷണം കഴിക്കരുത്. ഹിരണ്യകശിപുവിനെ കൊന്ന സമയമാണതെന്ന് പറയും. അതിന്റെ തത്വം, ആ സമയം അന്തരീക്ഷം ദുഷിച്ച വായുകൊണ്ട് നിറഞ്ഞിരിക്കും എന്നുള്ളതാണ്. ഒന്നിനും പൂര്‍ണതയില്ലാത്ത സമയമാണത്. ഈ സമയം വയറ് നിറയ്‌ക്കാനുള്ളതല്ല; നാമങ്ങള്‍ ഉരുവിട്ട് മനസ്സിനെയാണ് നിറയ്‌ക്കേണ്ടത്.
മാസത്തില്‍ രണ്ടു പ്രാവശ്യം വയറിളക്കുന്നത് നല്ലതാണ്. പ്രത്യേകിച്ച് സാധന ചെയ്യുന്നവര്‍. ഉള്ളില്‍ മലംകെട്ടി നിന്നാല്‍ ഏകാഗ്രത കിട്ടാന്‍ പ്രയാസമാണ്.
മത്സ്യമാംസങ്ങള്‍ കഴിച്ചുകൊണ്ടിരിക്കുന്നവര്‍, പെട്ടെന്ന് നിര്‍ത്തണം എന്ന് പറയുന്നില്ല. ക്രമേണ പൂര്‍ണമായും സസ്യാഹാരം മാത്രമാക്കുന്നതാണ് സാധനയ്‌ക്ക് ഉത്തമം. ഏതൊരു ശീലവും പെട്ടെന്ന് പിടിച്ചുനിര്‍ത്തുവാന്‍ പ്രയാസമാണ്. മനസ്സിനെ പഠിക്കുക, ക്രമേണ നിയന്ത്രണത്തില്‍ കൊണ്ടുവരിക.
