കണ്ണൂര്: എല്എല്ബി പ്രവേശനത്തിന് പ്രായപരിധി ഏര്പ്പെടുത്തിയത് പിന്വലിക്കണമെന്ന് എബിവിപി സംസ്ഥാന ജോയന്റ് സെക്രട്ടറി കെ.ഷിജില് പ്രസ്താവനയില് പറഞ്ഞു. ജുലൈ 28 ന് വന്ന പഞ്ചവത്സര ഇന്റഗ്രേറ്റഡ് എല്എല്ബി കോഴ്സിന്റെ നോട്ടിഫിക്കേഷനിലും ആഗസ്ത് 12 ന് വന്ന മൂന്നുവര്ഷ എല്എല്ബി കോഴ്സിന്റെ നോട്ടിഫിക്കേഷനിലും യാതൊരു തരത്തിലുമുള്ള പ്രായപരിധിയും ഏര്പ്പെടുത്തിയിരുന്നില്ല. ഇതു പ്രകാരം ഫീസടച്ച് അയ്യായിരത്തില് അധികം വിദ്യാര്ത്ഥികള് പരീക്ഷയെഴുതിയിരുന്നു. റാങ്ക് ലിസ്റ്റും കാറ്റഗറി ലിസ്റ്റും പ്രസിദ്ധീകരിച്ചതിനു ശേഷമാണ് പ്രായപരിധിയെക്കുറിച്ചുള്ള സര്ക്കുലര് വന്നത്. ഇതുകാരണം നിരവധി വിദ്യാര്ത്ഥികളുടെ ഭാവിപഠനം അവതാളത്തിലായിരിക്കുകയാണ്.
തിരുവനന്തപുരം ലോ അക്കാദമി പോലുള്ള സ്ഥാപനങ്ങളില് ഈ അദ്ധ്യയന വര്ഷത്തെ ക്ലാസ്സുകള് ആരംഭിച്ചിട്ട് ഒരു മാസത്തിലേറെയായി. പ്രായപരിധി കൂടിയ വിദ്യാര്ത്ഥികള് പഠനം അവസാനിപ്പിക്കേണ്ട ഗതികേടിലാണുള്ളത്. അതുകൊണ്ട് ഈ വര്ഷം പ്രായപരിധി ഏര്പ്പെടുത്തെരുതെന്ന് എബിവിപി ആവശ്യപ്പെട്ടു.
പ്രായപരിധി ഏര്പ്പെടുത്തിയത് പുന:പരിശോധിക്കണമെന്നാവശ്യപ്പെട്ട് എബിവിപി സുപ്രീം കോടതിയില് പൊതുതാല്പ്പര്യ ഹര്ജി സമര്പ്പിക്കുമെന്നും പ്രസ്താവനയില് അറിയിച്ചു.
