ന്യൂദല്ഹി: ഭാരതത്തിലെ എണ്ണ ശുദ്ധീകരണ, സംഭരണശാലകള് പാക്കിസ്ഥാന് ലക്ഷ്യമിടുന്നതായി റിപ്പോര്ട്ട്. പാക്ക് ചാരന്മാര് ഇത്തരം കേന്ദ്രങ്ങളുടെ വിവരം തേടിയെന്ന് കേന്ദ്ര രഹസ്യാന്വേഷണ വിഭാഗങ്ങള് പെട്രോളിയം മന്ത്രാലയത്തെ അറിയിച്ചു.
ആഭ്യന്തര മന്ത്രാലയവുമായി ചേര്ന്ന് സ്ഥിതിഗതികള് വിലയിരുത്തിയെന്നും സുരക്ഷ ശക്തമാക്കാന് നിര്ദേശം നല്കിയെന്നും പെട്രോളിയം മന്ത്രാലയം വ്യക്തമാക്കി.
എണ്ണ ശുദ്ധീകരണ മേഖലയിലെ ഉന്നത ഉദ്യോഗസ്ഥനുമായി പാക്ക് ചാരസംഘടന ഐഎസ്ഐയിലെ ചാരന് നടത്തിയ സംഭാഷണങ്ങളാണ് രഹസ്യാന്വേഷണ വിഭാഗത്തിന്റെ ശ്രദ്ധ ഇതിലേക്കു തിരിച്ചത്. റോയിലെ ഉദ്യോഗസ്ഥനെന്നു തെറ്റിദ്ധരിപ്പിച്ച് ടെലിഫോണില് ഉന്നത ഉദ്യോഗസ്ഥനെ ബന്ധപ്പെടുകയായിരുന്നു ഇയാള്.
രാജസ്ഥാനിലെ ഹൈഡ്രോകാര്ബണ് പൈപ്പ് ലൈനിനെക്കുറിച്ചാണ് ചോദിച്ചത്. തന്ത്രപ്രധാനമായ വിവരങ്ങള് ചോദിച്ചുവെന്നും റിപ്പോര്ട്ട്. ഇനിയും നീക്കങ്ങളുണ്ടായേക്കാമെന്നും രഹസ്യാന്വേഷണ വിഭാഗം മുന്നറിയിപ്പു നല്കുന്നു.
ഉദ്യോഗസ്ഥര് രഹസ്യ വിവരങ്ങള് ആരുമായും പങ്കുവയ്ക്കരുതെന്നു രഹസ്യാന്വേഷണ വിഭാഗവും പെട്രോളിയം മന്ത്രാലയവും നിര്ദേശം നല്കി.
