മുഹമ്മ: കാവുങ്കല് ദേവീക്ഷേത്രത്തില് ലക്ഷദീപ സമര്പ്പണത്തിനുള്ള ഒരുക്കങ്ങള് പൂര്ത്തിയായി. 10ന് ദേവീഭാഗവത നവാഹയജ്ഞം സമാപിക്കുന്നതിന് പിന്നാലെ ചൊവ്വാഴ്ച വിജയദശമി ദിനത്തിലാണ് ലക്ഷദീപം. ഭക്തസഹസ്രങ്ങളെ മുക്തി സാഗരത്തില് ആറാടിക്കുന്ന കാവുങ്കലമ്മയുടെ തിരുമുറ്റത്ത് അപൂര്വ്വ ദീപകാഴ്ച കാണാനും ദര്ശന പുണ്യം നേടാനും ദൂരദേശങ്ങളില് നിന്നുപോലും വിശ്വാസികള് എത്തും.
ദീപങ്ങള് ഒരുക്കാനുള്ള അഴികളുടെയും വിളക്കുമരങ്ങളുടെയും പണി അന്തിമ ഘട്ടത്തിലെത്തി. സമീപ പ്രദേശങ്ങളിലെ വിവിധ ക്ഷേത്രങ്ങളില് നിന്നും നിലവിളക്ക്,കുത്തുവിളക്ക്,മണ്ചെരാത്,കൊടിവിളക്ക്,കര്പ്പൂര തട്ട് എന്നിവ കാവുങ്കല് ക്ഷേത്രത്തില് എത്തി. തെക്കേതറമൂട് മുതല് വടക്കേ തറമൂട് വരേയുള്ള ഇരു ചേരിവാരപ്രദേശങ്ങളിലും ദീപം തെളിക്കും. കൂടാതെ ആലപ്പുഴ – തണ്ണീര്മുക്കം ദേശീയ പാതയ്ക്ക് ഇരുവശവും ദീപങ്ങളാല് അലംകൃതമാകും. ഒരുലക്ഷം ദീപമാണ് ലക്ഷ്യമിടുന്നതെങ്കിലും ഒന്നര ലക്ഷം കവിയുമെന്നാണ് സംഘാടകരുടെ വിലയിരുത്തല്. ക്ഷേത്രയോഗം പ്രസിഡന്റ് സി.പി. രവീന്ദ്രന്, സെക്രട്ടറി കെ.പി. ബിജു, മാനേജര്മാരായ ജി. ഉണ്ണികൃഷ്ണന്, അഡ്വ. പി.എസ്. സജീവ് എന്നിവരാണ് നേതൃത്വം നല്കുന്നത്.
ക്ഷേത്രത്തില് നവഗ്രഹ ശാന്തിഹവനവും പ്രാകാര വിളക്കും ഇന്ന് നടക്കും. വൈകുണ്ഠം, മൈനാകം, ഗോകര്ണം തുടങ്ങിയ ലോഹം കൊണ്ട് നിര്മിച്ച 18 കോട്ടകള് കടന്ന് ചിന്താമണി ഗ്രഹത്തിലെത്തിയ ഈശ്വരീയ ഭാവം നമ്മിലുണ്ടാകുമെന്ന് ആചാര്യന് ഭാഗവത രത്നം തണ്ണീര്മുക്കം സന്തോഷ്കുമാര് പറഞ്ഞു. വൈകിട്ട് 6ന് നടക്കുന്ന പ്രാകാരവിളക്കിന് കെ ശാന്തന് തേനാംപുറത്ത് ഭദ്രദീപ പ്രകാശനം ചെയ്യും.
