കണ്ണൂര്: സംസ്ഥാന സര്ക്കാരിന്റെ നൂറുദിനാഘോഷങ്ങളുടെ ഭാഗമായി കണ്ണൂര് ഗവ. വൊക്കേഷണല് ഹയര് സെക്കന്ററി സ്കൂളില് വൃക്കയുടെ കഥ പറഞ്ഞ് മെഡിക്കല് എക്സിബിഷന് സംഘടിപ്പിച്ചു. പരിയാരം മെഡിക്കല് കോളേജും വടകര തണലുമായി സഹകരിച്ചാണ് വൃക്കക്ക് ഒരു തണല് മെഡിക്കല് എക്സിബിഷന് സംഘടിപ്പിച്ചത്. വൃക്കയുടെ പ്രവര്ത്തനത്തെക്കുറിച്ചും രോഗങ്ങളെക്കുറിച്ചും തടയുന്നതിനുള്ള മാര്ഗങ്ങളെക്കുറിച്ചും രോഗം വന്നാല് ശ്രദ്ധിക്കേണ്ട കാര്യങ്ങളെക്കുറിച്ചുമുള്ള സചിത്ര വിവരങ്ങളും ഡോക്യുമെന്ററിയും ഉള്പ്പെടുത്തിയായിരുന്നു പ്രദര്ശനം. പ്രദര്ശനത്തിന്റെ ഭാഗമായി സൗജന്യ വൃക്കരോഗ നിര്ണയ ക്യാമ്പും അവയവ ദാനത്തിന്റെ മഹത്വത്തെക്കുറിച്ചും ആവശ്യകതയെക്കുറിച്ചുമുള്ള ബോധവല്ക്കരണവും നടന്നു. ഗര്ഭസ്ഥ ശിശുക്കളുടെ വളര്ച്ചയുടെ വിവിധ ഭാഗങ്ങള് കാണിക്കുന്ന മോഡലുകളും പ്രദര്ശിപ്പിച്ചു.
ജില്ലയിലെ വിവിധ പ്രസ് ഫോട്ടോഗ്രാഫര്മാരുടെയും പബ്ലിക് റിലേഷന്സ് വകുപ്പിന്റെയും ശ്രദ്ധേയമായ ഫോട്ടോകള് ഉള്പ്പെടുത്തി ഫോട്ടോ പ്രദര്ശനവും നടന്നു. സ്വാതന്ത്ര്യദിനത്തില് ആദ്യമായി പുറത്തിറക്കിയ സ്റ്റാമ്പും വിവിധ ദേശീയനേതാക്കളുടെ പേരിലുള്ള സ്റ്റാമ്പുകളും ഉള്പ്പെടെ നിരത്തി പഴയങ്ങാടിയിലെ കല്ലുപറമ്പില് ഹര്ഷന് ഒരുക്കിയ സ്റ്റാമ്പ് പ്രദര്ശനം ശ്രദ്ധേയമായി. വിവിധ പ്രസാധകരുടെ പുസ്തകങ്ങളുടെയും ഇന്ഫര്മേഷന് ആന്റ് പബ്ലിക് റിലേഷന്സ് വകുപ്പിന്റെയും പ്രസിദ്ധീകരണങ്ങളുടെ പ്രദര്ശനവും വില്പനയും ഒരുക്കി. പ്രദര്ശനങ്ങള് ഇന്നും തുടരും. രാവിലെ 10 മണി മുതല് വൈകിട്ട് 5 മണി വരെ പൊതുജനങ്ങള്ക്ക് മെഡിക്കല് എക്സിബിഷനും ഫോട്ടോ പ്രദര്ശനവും കാണാം.
