തോട്ടപ്പള്ളി: തോട്ടപ്പള്ളിയില് സാമൂഹ്യവിരുദ്ധര് മത്സ്യവില്പന തൊഴിലാളിയുടെ മിനിലോറിയും മത്സ്യവും കത്തിച്ചു. തോട്ടപ്പള്ളി കൊട്ടാരവളവ് പൂഞ്ഞാന്കാട്ടില് രഘുവിന്റെ ഉടമസ്ഥതയിലുള്ള കെഎല് 29 എഫ് 9556 രജിസ്ട്രേഷനിലുള്ള പിക്കപ് വാനും അതിലുണ്ടായിരുന്ന കായല്മത്സ്യവും ബോക്സുകളുമാണ് കത്തിനശിച്ചത്.
ബോക്സുകളില് നിറച്ച് വില്പനയ്ക്കായി കൊണ്ടുപോകാന് വച്ചിരുന്ന മത്സ്യം വെളുപ്പിന് മൂന്നരയോടെ സാമൂഹ്യവിരുദ്ധര് വാഹനം ഉള്പ്പെടെ കത്തിക്കുകയായിരുന്നു. തോട്ടപ്പള്ളി കൊച്ചുപാലത്തിനു സമീപം സ്വകാര്യ വ്യക്തിയുടെ പുരയിടത്തിലാണ് വാഹനം പാര്ക്കുചെയ്തിരുന്നത്. വെളുപ്പിനെ മത്സ്യവുമായി മാര്ക്കറ്റില് പോകാനായി രഘുഎത്തിയപ്പോള് തീയും പുകയും ഉയരുന്നതാണ് കണ്ടത്.
ഉടനെ ഫയര്ഫോഴ്സിനെ വിവിരമറിയിച്ചെങ്കിലും ഇവരെത്തിയപ്പോഴേക്കും വാഹനം ഉള്പ്പെടെ പൂര്ണ്ണമായും കത്തിനശിച്ചിരുന്നു. വാഹനം ഉള്പ്പെടെ നാലുലക്ഷം രൂപയുടെ മുകളില് നഷ്ടം സംഭവിച്ചതായി കണക്കാക്കുന്നു. കഴിഞ്ഞ കുറേ നാളുകളായി തോട്ടപ്പള്ളി ഭാഗത്ത് സാമൂഹ്യവിരുദ്ധരും മയക്കുമരുന്നു സംഘങ്ങളും നാട്ടുകാരുടെ സൈ്വര്യജീവിതം നശിപ്പിക്കുന്നതായി പരാതി ഉയരുന്നുണ്ട്. പകലും രാത്രിയും ഒരുപോലെയാണ് ഇവര് നാട്ടുകാര്ക്ക് ഭീഷണിയാകുന്നത്.
