ആലപ്പുഴ: മലയാളിക്കൊപ്പം ഓണാഘോഷത്തിന് ദേശക്കാരുമെത്തിയതോടെ കായല് ടൂറിസം മേഖലയ്ക്കും ഉണര്വ്വ്. വിദേശികളും സ്വദേശികളുമടങ്ങുന്ന നിരവധി സംഘങ്ങളാണ് ഓണാഘോഷത്തോടൊപ്പം ആലപ്പുഴയുടെ കായല് സൗന്ദര്യം നുകരാന് എത്തിയത്. ഇങ്ങനെയെത്തുന്നവര്ക്ക് ഓണസദ്യയും ഓണക്കളികളും ഒരുക്കി വന് സ്വീകരണമാണ് നല്കുന്നത്. എവിടെ നോക്കിയാലും ആഘോഷത്തിന്റെ ഉത്സവകാലം.
മഴമാറി തെളിഞ്ഞ കാലാവസ്ഥ കൂടി ആയതിനാല് ഓണവിപണിക്കൊപ്പം കായല് ടൂറിസത്തിനും ലഭിച്ച ഈ ഉണര്വ്വ് പരമാവധി മുതലെടുക്കാനുള്ള തയ്യാറെടുപ്പിലാണ് ടൂറിസം മേഖല. ഇതിന്റെ ഭാഗമായി ഹൗസ്ബോട്ടുകളും മോട്ടോര് ബോട്ടുകളും ശിക്കാര വള്ളങ്ങളും യാത്രാനിരക്ക് കൂട്ടിയിട്ടുണ്ട്.
മുന്കൂട്ടി ബുക്ക് ചെയ്ത ഹൗസ് ബോട്ടുകളൊഴിച്ച് പുതുതായി എത്തിയവരെല്ലാം വര്ദ്ധിപ്പിച്ച നിരക്ക് നല്കിയാണ് ആഘോഷയാത്രകള് നടത്തുന്നത്. ഒരു കിടക്കമുറി മാത്രമുള്ള ഹൗസ് ബോട്ടു യാത്രയ്ക്ക് 6,500 മുതല് 8,000 രൂപ വരെയും രണ്ടു മുറിക്ക് 9,000 മുതല് 12,000 വരെയും, മൂന്നു മുറിക്ക് 14,000 മുതല് 18,000 വരെയും നാലുമുറികള്ക്ക് 17,000 മുതല് 22,000 വരെയും അഞ്ചുമുറികള് 22,000- 26,000, ആറ്മുറി 28,000- 32,000, ഏഴുമുറികള് 32,000 -36,000, എട്ടുമുറി 36,000- 44,000, ഒന്പതിന് 45,000- 60,000 എന്നിങ്ങനെയാണ് ഹൗസ് ബോട്ടുകളുടെ പുതിയ വര്ദ്ധിപ്പിച്ച നിരക്ക്. എന്നാല് പകല് മാത്രമുള്ള യാത്രയ്ക്ക് നിരക്ക് കുറച്ചിട്ടുണ്ട്.
പകല് സമയത്തുള്ളവിനോദയാത്രകള്ക്ക് ശിക്കാരവള്ളങ്ങള് 7,000 മുതല് 15,000 വരെ ഈടാക്കുന്നു. മണിക്കൂറിന് 1,500 രൂപയ്ക്കാണ് വാടകയ്ക്ക് നല്കുന്നത്. ആഴ്ചകള്ക്കുമുമ്പ് 400 മുതല് 600 രൂപവരെ വാങ്ങി ഓടിക്കൊണ്ടിരുന്ന സ്ഥാനത്താണ് ഇപ്പോള് ഈ നിരക്ക് വര്ദ്ധന.
