അമ്പലപ്പുഴ: രോഗികള്ക്കും കൂട്ടിരിപ്പുകാര്ക്കും ഓണസദ്യയൊരുക്കി സേവാഭാരതി. വണ്ടാനം മെഡിക്കല്കോളേജ് ആശുപത്രിയിലാണ് ആയിരങ്ങള്ക്ക് ഓണസദ്യവിളമ്പി ഒന്പതാം വര്ഷവും സേവാഭാരതി മാതൃകയായത്. ഓണസദ്യയ്ക്കൊപ്പം നിര്ധനരായവര്ക്ക് ഓണക്കോടിയും വിതരണം ചെയ്തു.
തിരുവോണദിവസം ആശുപത്രി വളപ്പില് പ്രത്യേകം തയ്യാറാക്കിയ പന്തലിലായിരുന്നു ഓണസദ്യവിളമ്പിയത്. സദ്യയുടെ ഉദ്ഘാടനം അമ്പലപ്പുഴ സിഐ എ.വിശ്വംഭരനും ഓണക്കോടി വിതരണത്തിന്റെ ഉദ്ഘാടനം അമ്പലപ്പുഴവടക്ക് ഗ്രാമപഞ്ചായത്ത് പ്രസിഡന്റ് അഫ്സത്തും നിര്വ്വഹിച്ചു. വര്ഷങ്ങളായി ദിവസവും രാവിലെയും വൈകിട്ടും കഞ്ഞിവിതരണവും രക്തദാനം എന്നിവയും ആശുപത്രി കേന്ദ്രീകരിച്ച് സേവാഭാരതി നടത്തിവരുന്നു.
ജില്ലാ പഞ്ചായത്ത് അംഗം എ.ആര്.കണ്ണന്, ഗ്രാമപഞ്ചായത്തംഗങ്ങളായ സി.ഷാജി, സി.പ്രദീപ്, ആര്എസ്എസ് താലൂക്ക് സംഘചാലക് ആര്.സുന്ദര്, ജില്ലാകാര്യവാഹ് ഷിജു, താലൂക്ക് കാര്യവാഹ് ഉണ്ണികൃഷ്ണന്, ജനറല്സെക്രട്ടറി കെ.ബൈജു, ഡോക്ടര്മാരായ നോനാന് ചെല്ലപ്പന്, പി.വേണുഗോപാല് എന്നിവര് പങ്കെടുത്തു.
