കോട്ടയം: ചരിത്രപ്രസിദ്ധമായ 117-ാമത് ഗെയില് കോട്ടയം മത്സര വള്ളംകളി 11ന് ഉച്ചകഴിഞ്ഞ് 1.30മുതല് താഴത്തങ്ങാടിയാറ്റില് അരങ്ങേറും കോട്ടയം വെസ്റ്റ് ക്ലബ്, ജില്ലാ ടൂറിസം പ്രൊമോഷന് കൗണ്സിലിന്റെയും, കോട്ടയം നഗരസഭയുടെയും, തിരുവാര്പ്പ് പഞ്ചായത്തിന്റെയും സഹകരണത്തോടെയാണ് ഈ മത്സരവള്ളംകളി സംഘടിപ്പിക്കുന്നത്. ജില്ലാ ടൂറിസം പ്രൊമോഷന് കൗണ്സില് കോട്ടയം ജില്ലയില് സംഘടിപ്പിക്കുന്ന ഓണാഘോഷ പരിപാടികള് ഈ മത്സരവള്ളംകളിയോടെ ആരംഭിക്കും.
ജവഹര് തായങ്കരി, കാരിച്ചാല്, ആയാപറമ്പ് വലിയദിവാന്ജി, സെന്റ് ജോര്ജ്ജ്, നടുഭാഗം, സെന്റ് പയസ്, ആയാപറമ്പ് പാണ്ടി, മഹാദേവികാട് കാട്ടില് തെക്കേതില്, ചമ്പക്കുളം തുടങ്ങിയ പ്രമുഖ കളിവള്ളങ്ങള് മത്സരത്തില് പങ്കെടുക്കും. ഉച്ചകഴിഞ്ഞ് 1.30ന് ജില്ലാ പോലീസ് മേധാവി എന്.രാമചന്ദ്രന് ഐപിഎസ് പതാക ഉയര്ത്തുന്നതോടെ ഉദ്ഘാടന സമ്മേളനം ആരംഭിക്കും. യോഗത്തില് തിരുവഞ്ചൂര് രാധാകൃഷ്ണന് എംഎല്എ അദ്ധ്യക്ഷത വഹിക്കും. മന്ത്രി പി.തിലോത്തമന് മത്സരവള്ളംകളി ഉദ്ഘാടനം ചെയ്യും. ജോസ്.കെ.മാണി എംപിക്ക് സുവനീര്പ്രഥമ കോപ്പി നല്കിക്കൊണ്ട് പത്മഭൂഷണ് ജസ്റ്റീസ് കെ.ടി.തോമസ് സുവനീര് പ്രകശനം നിര്വ്വഹിക്കും. മുഖ്യപവലിയന് മുന്നില് കളിവള്ളങ്ങളുടെ മാസ് ഡ്രില്ലും നടത്തും. വി.എന്.വാസവന് എക്സ് എംഎല്എ കളിവള്ളങ്ങളുടെ ഘോഷയാത്ര സ്റ്റാര്ട്ടിംഗ് പോയിന്റിലേക്ക് ഫ്ളാഗ് ഓഫ് ചെയ്യും. സുരേഷ് കുറുപ്പ് എംഎല്എ, ബിജെപി സംസ്ഥാന വൈസ് പ്രസിഡന്റ് ജോര്ജ്ജ് കുര്യന്, നഗരസഭാദ്ധ്യക്ഷ ഡോ.പി.ആര്.സോന, തിരുവാര്പ്പ് പഞ്ചായത്ത് പ്രസിഡന്റ് ജെസി നൈനാന്, ജനയുഗം സിഇഒ ആന്റ് എംഡി അഡ്വ വി.ബി.ബിനു, താഴത്തങ്ങാടി ജുമാ മസ്ജിദ് ഇമാം തുടങ്ങിയവര് സംസാരിക്കും. വള്ളംകളിക്ക് മുന്നോടിയായി ഇന്ന് വൈകിട്ട് 5മുതല് റേസ് കോഴ്സിന്റെ തീരത്ത് വഞ്ചിപ്പാട്ട് മത്സരം നടക്കും. കോട്ടയം, ആറന്മുള കുട്ടനാടന് ടീമുകള് മത്സരത്തില് പങ്കെടുക്കും. തിരുവഞ്ചൂര് രാധാകൃഷ്ണന് മത്സരം ഉദ്ഘാടനം ചെയ്യും. പത്രസമ്മേളനത്തില് ഡോ.പി.ആര്.സോന, പ്രൊഫ കെ.സി.ജോര്ജ്ജ്, ലിയോ മാത്യു, കെ.ജെ.ജേക്കബ്, എസ്.രാധാകൃഷ്ണന് നായര്, നാസര് ചാത്തംകോട്ടുമാലി, സുനില് എബ്രഹാം, അഷ്റഫ്, വറുഗീസ് ചെമ്പോല എന്നിവര് പങ്കെടുത്തു.
