കൊച്ചി: ഓണ്ലൈന് റെയില്വേ ടിക്കറ്റുകളില് കൃത്രിമം നടത്തി വില്ക്കുന്ന ട്രാവല് ഏജന്സിയുടമയെ റെയില്വേ പോലീസ് അറസ്റ്റ്ചെയ്തു. പെരുമ്പാവൂര് ഗാന്ധിബസാറില് മനോജ് ട്രാവല്സ് നടത്തുന്ന പശ്ചിമബംഗാള് അലിനഗര് സ്വദേശി മനോജ്കുമാര് മണ്ഡല് (24) ആണ് പിടിയിലായത്. പെരുമ്പാവൂരിലെ ഓഫീസില് നടത്തിയ റെയ്ഡില് 1,89,766 രൂപയുടെ എണ്പതോളം ടിക്കറ്റും അച്ചടിക്കാന് ഉപയോഗിച്ച കമ്പ്യൂട്ടറും പ്രിന്ററും പിടിച്ചെടുത്തു.
ഐആര്സിടിസി വെബ്സൈറ്റില്നിന്ന് 25ഓളം വ്യാജ തിരിച്ചറിയല് രേഖകള് ഉപയോഗിച്ചാണ് ഇയാള് ടിക്കറ്റെടുത്തിരുന്നത്.
ദീര്ഘദൂര ട്രെയിനുകളില് സാധാരണ ടിക്കറ്റുകളെടുത്ത് റിസര്വേഷന് ടിക്കറ്റുകളായി കൃത്രിമം വരുത്തിയാണ് പണം വാങ്ങിയത്. 72 സീറ്റുള്ള കംപാര്ട്ട്മെന്റില് 74, 75 സീറ്റ് നമ്പറും ഇയാള് ടിക്കറ്റില് പ്രിന്റ്ചെയ്ത് നല്കിയിരുന്നു.
ബംഗാളിലും കേരളത്തിലുമുള്ള രണ്ട് ബാങ്ക് അക്കൗണ്ടിലൂടെയാണ് പണം കൈമാറിയിരുന്നത്. വ്യാജടിക്കറ്റുകള് വിറ്റതിന് ഇയാളെ എറണാകുളം സിജെഎം കോടതിയില് ഹാജരാക്കി റിമാന്ഡ്ചെയ്തു.
