കൊച്ചി: ഗണേശ വിഗ്രഹ പ്രതിഷ്ഠാ വേദിയെ ധന്യമാക്കി സംഗീതജ്ഞന് കെ.ജി. ജയന്റെ ഗാനാര്ച്ചന. ജസ്റ്റിസ് പി.എന്. രവീന്ദ്രനാഥ് ചടങ്ങ് ഉദ്ഘാടനം ചെയ്ത ശേഷം മൈക്ക് കയ്യിലെടുത്ത ജയന് അവശത മറന്ന് വാതാപി കീര്ത്തനവും ഗണേശ സ്തുതികളും മതിമറന്ന് ആലപിച്ചപ്പോള് ഭക്തരും ക്ഷേത്ര മൈതാനിയും ആ ഗാന മാധുരിയില് അലിഞ്ഞു. കാറപകടത്തില്നിന്ന് ഗണേശാനുഗ്രഹത്താല് രക്ഷപെട്ട കഥ വികാരപരമായി പറഞ്ഞു തുടങ്ങിയ ജയന് കുട്ടികള്ക്ക് സംഗീതത്തെ കുറിച്ചുള്ള അടിസ്ഥാന പാഠങ്ങളും പകര്ന്നു നല്കി. ഈശ്വരന്റെ വരദാനമാണ് സംഗീതമെന്നും സംഗീതവും ഈശ്വരകടാക്ഷവും ഒരു പോലെ ലഭിക്കുന്നവര് ഭാഗ്യവാന്മാരാണെന്നും ജയന് പറഞ്ഞു.
രാവിലെ മുരുകന്കോവില് മേല്ശാന്തി അമൃതകടെശന് പ്രതിഷ്ഠാകര്മം നിര്വഹിച്ചു. വൈകിട്ട് കീഴൂര് മധുവും ബേബി എം മാരാരും ചേര്ന്ന് നടത്തിയ പഞ്ചവാദ്യവും നടന്നു. ദേശീയ നൃത്തോത്സവത്തിന്റെ ഭാഗമായി മാളവിക സുനില് നെല്ലായി, അഭിഭാഷക കൂടിയായ ദീപ്തി എന്നിവര് ഭരതനാട്യം അവതരിപ്പിച്ചു. ഇന്ന് രാവിലെ 6 .30 ന് ശിവക്ഷേത്ര സമുച്ചയത്തില് ഗണപതിഹോമവും പൂജയും നടക്കും. 9 ന് നാരായണീയവും വൈകിട്ട് 5 ന് ഭക്തിഗാനമേളയും നടക്കും. രാത്രി 6.30 ന് നടക്കുന്ന രാജ്യാന്തര നൃത്തോത്സവത്തില് ദിവ്യ എസ് പിള്ള, കാവ്യ കാശിനാഥന് എന്നിവര് ഭരതനാട്യം അവതരിപ്പിക്കും.
