കൊല്ലം: സിപിഎമ്മിന്റെ കൗണ്സിലര് കൂടിയായ സമരസമിതി നേതാവ് നാട്ടുകാരുടെ സ്ഥാപനങ്ങളെല്ലാം ബലമായി അടപ്പിച്ചുകൊണ്ട് സ്വന്തം സ്ഥാപനം തുറന്നുപ്രവര്ത്തിപ്പിച്ചത് വിരോധാഭാസമായി.
ആശ്രാമം ശിവജിമുക്കിലുള്ള ജ്യോതി ഡ്രൈവിങ് സ്കൂളിന്റെ ഉടമയും സിപിഎം നേതാവുമായ രവീന്ദ്രനാണ് സ്വന്തം സ്ഥാപനം തുറന്നുപ്രവര്ത്തിപ്പിച്ചത്. ഇന്നലെ രാവിലെ ആറരക്ക് തന്നെ പതിവുപോലെ ‘രവീന്ദ്രനാശാന്’ സ്ഥാപനം തുറക്കുകയായിരുന്നു. രണ്ട് സ്ത്രീകള് അടക്കം നാലു ജീവനക്കാരും സ്ഥാപനത്തിലുണ്ടായിരുന്നു.
കടപ്പാക്കടയിലെയും ചിന്നക്കടയിലെയും ആശ്രാമത്തെയും കടകള് സമരാനുകൂലികള്ക്കൊപ്പം പ്രകടനമായി ചെന്ന് അടപ്പിച്ച നേതാവിന്റെ സ്വന്തം സ്ഥാപനം തുറന്നിരിക്കുന്നത് അനുയായികളുടെ ശ്രദ്ധയില്പെടുത്തിയപ്പോള് വാതുറന്ന് അത്ഭുതപ്പെട്ടതല്ലാതെ മറ്റൊരു പ്രയോജനവുമുണ്ടായില്ല. സ്ഥലത്തെ കൗണ്സിലര് കൂടിയായതിനാല് കോര്പ്പറേഷനില് നല്കേണ്ട അപേക്ഷകളും മറ്റും തയ്യാറാക്കാനും പൂര്ത്തിയായവ സൂക്ഷ്മമായി പരിശോധിക്കാനും വേണ്ടിയാണ് സ്ഥാപനം തുറന്നതെന്നായിരുന്നു രവീന്ദ്രന്റെ വാദം.
അതേസമയം ഇത്തരം ജോലികളെല്ലാം സ്വന്തം വീട്ടിലിരുന്നാണ് ഇത്രയും കാലം കൗണ്സിലര് ചെയ്തതെന്നും ഇപ്പോഴത്തെ വാദം ജനങ്ങളെ കബളിപ്പിക്കാനാണെന്നും നാട്ടുകാര് ചൂണ്ടിക്കാട്ടി.
രാഷ്ട്രീയപ്രേരിതമായി ഒരുവിഭാഗം ട്രേഡ് യൂണിയനുകള് ആഹ്വാനം ചെയ്ത പണിമുടക്ക് ജനത്തെ ആകെ വലച്ചു. ഇടതുമുന്നണിയുടെ ആഭിമുഖ്യത്തിലുള്ള വിവിധ സംഘടനകളും പോഷകസംഘടനകളും നഗരത്തിലുള്പ്പെടെ പ്രകടനങ്ങള് നടത്തി. കടകമ്പോളങ്ങള് പൂര്ണമായും അടഞ്ഞു കിടന്നിരുന്നതിനാല് വ്യാപാര മേഖല സ്തംഭിച്ചു. കെഎസ്ആര്ടിസി, പ്രൈവറ്റ് ബസ് ഉള്പ്പെടെയുള്ള വലിയ വാഹനങ്ങളും നിരത്തിലിറങ്ങിയില്ല. എന്നാല് ദീര്ഘദൂരം ഉള്പ്പെടെയുള്ള തീവണ്ടി സര്വീസിനെ ഹര്ത്താല് അല്പം പോലും തടസ്സപ്പെടുത്തിയില്ല.
ദൂരദിക്കുകളില് നിന്നും റെയില്വെ സ്റ്റേഷനില് വന്നിറങ്ങിയ സ്ത്രീകളും കുട്ടികളും ഉള്പ്പെടെയുള്ള യാത്രക്കാര് വീടുകളിലെത്താന് വാഹനങ്ങള് ലഭിക്കാതെ ഏറെ ബുദ്ധിമുട്ടി. പലരും ബന്ധുക്കളെ വിളിച്ചുവരുത്തിയാണ് ഇവിടെനിന്നും യാത്രയായത്.
ചിലരാകട്ടെ പകല് മുഴുവനും റെയില്വെ സ്റ്റേഷനില് കഴിച്ചു കൂട്ടി. സര്ക്കാര്, അര്ധസര്ക്കാര്, പൊതുമേഖല, സ്വകാര്യമേഖല ഉള്പ്പെടെയുള്ളവ പൂര്ണമായും സ്തംഭിച്ചു. ജീവനക്കാര്ക്ക് ഇവിടങ്ങളിലെങ്ങും ജോലിക്ക് ഹാജരാകാന് സാധിച്ചില്ല.
