കൊല്ലം: സൗജന്യ ഓണകിറ്റുകള് ഏറ്റുവാങ്ങുമ്പോള് പലരുടെയും കണ്ണുകളില് നനവു പടര്ന്നു. സാന്ത്വന പരിചരണത്തില് കഴിയുന്നവര്ക്ക് ഓണക്കിറ്റ് വിതരണം ചെയ്ത കൊല്ലം ജില്ലാ ആശുപത്രിയിലെ ചടങ്ങ് വികാരഭരിതമായി. ജില്ലാപഞ്ചായത്ത്, ജില്ലാ ആശുപത്രി, ദേശീയ ആരോഗ്യ ദൗത്യം എന്നിവയുടെ സംയുക്താഭിമുഖ്യത്തിലാണ് പരിപാടി സംഘടിപ്പിച്ചത്.
പരിപാടി ഉദ്ഘാടനം ചെയ്ത മുകേഷ് എംഎല്എയും അധ്യക്ഷത വഹിച്ച ജില്ലാ പഞ്ചായത്ത് പ്രസിഡന്റ് കെ ജഗദമ്മയും രോഗികള്ക്കടുത്തെത്തി ആശ്വസിപ്പിച്ചു. പൊതുജന പങ്കാളിത്തത്തോടെ സാന്ത്വനപരിചരണം പരമാവധി വ്യാപകമാക്കണമെന്ന് മുകേഷ് പറഞ്ഞു. ജില്ലാ ആശുപത്രിയില്നിന്നും സ്വാന്തന ചികിത്സ നല്കുന്ന 150 പേര്ക്കാണ് ഓണക്കിറ്റുകളും ഓണക്കോടിയും വിതരണം ചെയ്തത്. ചടങ്ങിനുശേഷം ഒന്നിച്ച് ഉച്ചഭക്ഷണവും കഴിച്ചാണ് രോഗികള് മടങ്ങിയത്. അഞ്ചുകിലോ അരി, പഞ്ചസാര, വെളിച്ചെണ്ണ, തുവരപ്പരിപ്പ് പപ്പടം, തേയില, ഉപ്പ്, പായസം മിക്സ് എന്നിവ ഉള്പ്പെടുന്ന കിറ്റ് സ്വകാര്യവ്യക്തികളും സ്ഥാപനങ്ങളും സംഘടനകളുമാണ് സ്പോണ്സര് ചെയ്തത്. കാമ്പസ് പാലിയേറ്റീവ് കെയര് പരിപാടിയുടെ ഭാഗമായ ടികെഎം എഞ്ചിനിയറിംഗ് കോളേജിലെയും എസ്.എന്.കോളേജിലെയും വിദ്യാര്ത്ഥികളും പരിപാടിയുമായി സഹകരിച്ചു. ജില്ലാ പഞ്ചായത്ത് വൈസ് പ്രസിഡന്റ് പി.ശിവശങ്കരപ്പിള്ള, ആരോഗ്യവിദ്യാഭ്യാസ സ്ഥിരംസമിതി ചെയര്പേഴ്സണ് ജൂലിയറ്റ് നെല്സണ്, കോര്പ്പറേഷന് ആരോഗ്യ സ്ഥിരംസമിതി ചെയര്മാന് എസ്.ജയന്, ആശുപത്രി മാനേജ്മെന്റ് കമ്മിറ്റിയംഗം അജയകുമാര്, ആശുപത്രി സൂപ്രണ്ട് എ.എല്.ഷീജ, ഡെപ്യൂട്ടി സൂപ്രണ്ട് പ്രീതി ജെയിംസ്, ആര്എംഒ ഡോ.അനില്കുമാര്, ഡോ.എസ്.സമീര്, സാന്ത്വനചികിത്സാ വിഭാഗം മെഡിക്കല് ഓഫീസര് ഡോ.ഷാജി, അനൂജ് എന്നിവര് പങ്കെടുത്തു.
