കൊല്ലം: കേന്ദ്രസര്ക്കാരിന്റെ 35 ലക്ഷം രൂപയുടെ ധനസഹായത്തോടെ കുടുംബശ്രീ മിഷന് സംഘടിപ്പിക്കുന്ന സരസ് ദേശീയമേളക്ക് ഇന്ന് കൊല്ലം ആശ്രാമം മൈതാനിയില് തുടക്കമാകും. തദ്ദേശസ്വയംഭരണവരുപ്പ്, ജില്ലാപഞ്ചായത്ത്, കോര്പ്പറേഷന് എന്നിവയുടെ സഹകരണത്തോടെയുള്ള മേള 13 വരെയാണെന്ന് സ്വാഗതസംഘം ചെയര്മാന് കൂടിയായ ജില്ലാ പഞ്ചായത്ത് പ്രസിഡന്റ് കെ.ജഗദമ്മ പത്രസമ്മേളനത്തില് പറഞ്ഞു.
രാജ്യത്തെ 22 സംസ്ഥാനങ്ങളില് നിന്നുള്ള സ്റ്റാളുകള് മേളയില് സജ്ജമാക്കിയിട്ടുണ്ട്. ഇവര്ക്കായി ആശ്രാമം ഹോക്കി സ്റ്റേഡിയത്തിലാണ് താമസസൗകര്യം ഒരുക്കിയിട്ടുള്ളത്. ഹരിയാന, ആന്ധ്രാപ്രദേശ്, ആസാം, ഗുജറാത്ത്, ബീഹാര്, പശ്ചിമബംഗാള്, ഗോവ, തമിഴ്നാട്, കര്ണാടക, ഝാര്ഖണ്ഡ്, രാജസ്ഥാന്, സിക്കിം, മഹാരാഷ്ട്ര, ഒറീസ, മണിപ്പൂര്, ഉത്തര്പ്രദേശ്, മധ്യപ്രദേശ്, ത്രിപുര, പഞ്ചാബ് എന്നിവിടങ്ങളില് നിന്നുള്ള കരകൗശലവസ്തുക്കള് മേളയില് സുലഭമാണ്. ഇത് കൂടാതെ ഈ സംസ്ഥാനങ്ങളില് നിന്നുള്ള തുണിത്തരങ്ങള്, തുകല് ഉല്പ്പന്നങ്ങള്, ആഭരണങ്ങള്, ഗ്ലാസ് കളിപ്പാട്ടങ്ങള്, ടെറാകോട്ട ഉല്പ്പന്നങ്ങള്, മണ്പാത്രങ്ങള്, ഭക്ഷണസാമഗ്രികള്, മസാലപൊടികള് എന്നിവക്കൊപ്പം മറ്റനേകം വൈവിധ്യമാര്ന്ന ഇനങ്ങളും മേളയില് അണിനിരത്തും. മേളയോടനുബന്ധിച്ച് ദേശീയ ഭക്ഷ്യമേളയില് വിവിധ സംസ്ഥാനങ്ങളില് നിന്നുള്ള വിഭവങ്ങള് ലഭ്യമാക്കും. ഭക്ഷണപ്രേമികള്ക്ക് ഏറ്റവും നല്ല അവസരമായി മേള മാറ്റിയെടുക്കുവാനുള്ള സജ്ജീകരണങ്ങളായി. എല്ലാദിവസവും വൈകിട്ട് സാംസ്കാരിക കലാരിപാടികള് സംഘടിപ്പിക്കുന്നുണ്ട്. ഇതില് ജനപ്രതിനിധികളും മന്ത്രിമാരും മറ്റും മുഖ്യാതിഥികളാകും. മാജിക് ഷോ, നൃത്തനൃത്യങ്ങള്, ഗോത്രതാളം, കലാസംഗമം, കോമഡി നൈറ്റ്സ്, നാടകം, ഇശല്സന്ധ്യ എന്നിവയുണ്ടാകും. ആധാര് രജിസ്ട്രേഷനും മെഡിക്കല് ക്യാമ്പും പാല് ഗുണനിലവാര പരിശോധനയും കുട്ടികള്ക്കും മുതിര്ന്നവര്ക്കുമായി അമ്യൂസ്മെന്റ് പാര്ക്കും മേളയിലുണ്ട്. പൂര്ണസമയ ഡോക്ടര്മാരുടെയും മറ്റും സേവനമുണ്ടാകും. പ്രവേശനഫീസില്ല.
നാളെ വൈകിട്ട് നാലിന് മന്ത്രി കെ.ടി.ജലീല് മേളയുടെ ഉദ്ഘാടനം നിര്വഹിക്കും. മേയര് വി.രാജേന്ദ്രബാബു അധ്യക്ഷനായിരിക്കും. കെ.സോമപ്രസാദ് എംപി ആദ്യവില്പ്പന നിര്വഹിക്കും. ഇന്ത്യ ഫുഡ്കോര്ട്ട് ഉദ്ഘാടനം എന്.കെ.പ്രേമചന്ദ്രന് എംപിയും റിപ്പോര്ട്ട് അവതരണം എസ്.ഹരികിഷോറും നിര്വഹിക്കും.
കൊല്ലം ഈസ്റ്റ്, കരുനാഗപ്പള്ളി, കൊട്ടാരക്കര, കൊല്ലം, തൃക്കടവൂര് സിഡിഎസുകളുടെ പൊലിവ് സപ്ലിമെന്റ് പ്രകാശനം യഥാക്രമം കൊടിക്കുന്നില് സുരേഷ് എംപി, കെ.സി.വേണുഗോപാല് എംപി, ഐഷാപോറ്റി എംഎല്എ, എം.നൗഷാദ്, കോവൂര് കുഞ്ഞുമോന് എന്നിവര് നിര്വഹിക്കും. എസിപി സതീഷ് ബിനോ, ഗ്രാമവികസന കമ്മീഷണര് എ.ഷാജഹാന്, കെ.പി.കുറുപ്പ്, എം.എ.രാജഗോപാല്, എന്.കെ.ജയ, ഹണി ബെഞ്ചമിന്, രവീന്ദ്രന്, സി.മുകേഷ്, മുഹമദ് അന്സര് എന്നിവര് സംസാരിക്കും.
