കഴിഞ്ഞ ദിവസം എറണാകുളത്ത് ഹോട്ടല് വൈറ്റ് ഫോര്ട്ടില് ഒരു സിനിമയുടെ പൂജാച്ചടങ്ങില് സിബിമലയില് ചെയ്ത ചില കാര്യങ്ങള് എനിക്കേറെ അത്ഭുതവും ദുഃഖവും ഉണ്ടാക്കിയ ഒന്നാണ്. ബിജുലാല് സംവിധാനം ചെയ്യുന്ന ‘മള്ബറീസ്’ എന്ന ചിത്രത്തിന്റെ പുജയില് പങ്കെടുക്കാനായി ഞാനും സുഹൃത്തുകളും കൃത്യസമയത്തുതന്നെ അവിടെ എത്തി.
സംവിധായകന് സിബിമലയില് അവിടെ മുന്നിരയില്തന്നെ ഇരിപ്പുണ്ടായിരുന്നു. തൊട്ടുപുറകേ സംവിധായകന് വിനയന് എത്തി. സംഘാടകര് വിനയനെ സ്വീകരിച്ച് മുന്നിരയില്തന്നെ കൊണ്ടിരുത്തി. അദ്ദേഹമായിരുന്നു ചടങ്ങിന് ഭദ്രദീപം കൊളുത്തേണ്ടിയിരുന്നത്. വൈറ്റ്ഫോര്ട്ടിലെ എ.സി ഹാളില് സീറ്റുകള് നിറഞ്ഞുകവിഞ്ഞ് ആളുകള് നില്പ്പുണ്ടായിരുന്നു. വേദിയിലുണ്ടായിരുന്ന പെണ്കുട്ടി ചടങ്ങിനായി സ്റ്റേജിലേക്ക് എല്ലാരേം ക്ഷണിച്ചു. വിനയനെ കണ്ടതുമുതല് എങ്ങനെയും വെളിയില് ചാടാന് ശ്രമിക്കുന്ന മാതിരി അസ്വസ്ഥതകള് പ്രകടിപ്പിച്ചിരുന്ന സിബി മലയില് സ്റ്റേജിലോട്ടു കയറാന് വിനയന് എഴുന്നേറ്റതോടെ ആള്ക്കൂട്ടത്തെ തള്ളിമാറ്റി വെളീലോട്ടു പോയി.
ആ ധൃതിക്കിടയില് സിബിയുടെ കൈയിലിരുന്ന ബൊക്കെ അദ്ദേഹം വലിച്ചെറിഞ്ഞത് വന്നുവീണത് എന്റെ മുഖത്തായിരുന്നു. പക്ഷേ അതൊന്നും സിബിമലയില് അറിഞ്ഞില്ല. അദ്ദേഹം പുറത്തേക്കോടുകയായിരുന്നു. സംഘാടകര് മൈക്കിലൂടെ അദ്ദേഹത്തെ വിളിച്ചുകൊണ്ടിരുന്നു. ഇതിനിടയില് വിനയന് ചടങ്ങിനു വിളക്കുകൊളുത്തി. സ്റ്റേജിനു താഴെ നടക്കുന്ന സംഭവങ്ങള് മനസ്സിലാക്കിയതുകൊണ്ടാകാം ഒരു ചിരിയോടെ ആണ് വിനയന് സംസാരിക്കുന്നതു കണ്ടത്.
ചലച്ചിത്രകാരന്മാരുടെ നിലയ്ക്കും വിലയ്ക്കും ചേരാത്ത നടപടിയാണ് സിബിയുടെ ഭാഗത്തുനിന്നുണ്ടായതെന്ന് അവിടെ കൂടിയ പലരും സംസാരിക്കുന്നുണ്ടായിരുന്നു. നമ്മുടെ നാട്ടില് ബദ്ധവൈരികളായ രാഷ്ട്രീയ നേതാക്കള് ഒരേവേദിയില് സൗഹാര്ദ്ദപരമായി പങ്കെടുക്കുകയും തമ്മില് കുശലം പറയുകയും ചെയ്യാറുണ്ട്. അവരേക്കാളും വിവരമുണ്ടെന്നു ധരിക്കുന്ന സാംസ്കാരിക മേഖലയിലുള്ള സംവിധായകന് സിബി മലയിലിന്റെ, പകപോക്കലെന്നോ വിനയനോടുള്ള പേടിയെന്നോ ഒക്കെ വ്യഖ്യാനിക്കാവുന്ന ആ പ്രകടനം വളരെ മോശമായിപ്പോയി. സിനിമാക്കാര്ക്കുതന്നെ നാണക്കേടുണ്ടാക്കുന്നതാണ് എന്നൊക്കെ പൂജക്കായി വന്നവര് പറയുന്നുണ്ടായിരുന്നു.
വിനയനെ തോല്പ്പിക്കാന് കഴിഞ്ഞില്ലെങ്കില് പിന്നെ തോറ്റോടുക എന്നാണോ? അതോ അദ്ദേഹത്തെ മറ്റുള്ളവര് ബഹുമാനിക്കുന്നതു കാണാന് സിബി മലയിലിനു ശക്തിയില്ലെന്നോ? എങ്കില് അതിനെ അസൂയയെന്നേ വിളിക്കാനാവൂ. ഇനിയെന്നാണു നമ്മുടെ സിനിമാക്കാരും സിനിമാ സംഘടനകളും ഒന്നു നന്നാകുക.
