കൊച്ചി: ആംഗ്ലോ ഇന്ത്യന് സമുദായത്തിലും സംഘടനകളിലും മാറ്റങ്ങള് അനിവാര്യമാണെന്ന് പ്രൊഫ.റിച്ചാര്ഡ് ഹെ എംപി പറഞ്ഞു. ജോണ് ഫെര്ണാണ്ടസ് എംഎല്എയ്ക്ക് ദ യൂണിയന് ഓഫ് ആംഗ്ലോ-ഇന്ത്യന് അസോസിയേഷന് നല്കിയ സ്വീകരണത്തില് മുഖ്യ പ്രഭാഷണം നടത്തുകയായിരുന്നു അദ്ദേഹം. ഒരുകാലത്ത് സമൂഹത്തിന്റെ എല്ലാ മേഖലകളിലും ഉന്നതിയില് നിന്നവരായിരുന്നു ആംഗ്ലോ ഇന്ത്യന്സ്. എന്നാല് ഇപ്പോഴതല്ല സ്ഥിതി.
സമുദായം ഇന്ന് പിന്നാക്കാവസ്ഥയിലാണ്. മാനവവിഭവശേഷിയില് വികാസമുണ്ടാകുകയും അതു ശരിയായി വിനിയോഗിക്കപ്പെടുകയും വേണം. സമുദായത്തിലും സംഘടനകളിലും കാലത്തിനനുസരിച്ച് മാറ്റങ്ങള് അനിവാര്യമാണ്. യുവജനങ്ങളെ കൂടുതല് പ്രവര്ത്തനരംഗത്തേക്ക് കൊണ്ടുവരികയും അവരെ ശാക്തീകരിക്കുകയും വേണം.
സമുദായത്തിന് ലോക്സഭയിലും നിയമസഭയിലും ഭരണഘടന അനുസരിച്ച് നല്കിയിട്ടുള്ള പ്രാതിനിധ്യം ഏറെ പ്രയോജനപ്പെട്ടിട്ടുണ്ട്. എന്നാല് പലപ്പോഴും സമുദായത്തിന് അടിയന്തരമായ പല കാര്യങ്ങളും നേടിയെടുക്കാന് സാധിച്ചിട്ടില്ല. ഗുണപരമായ മാറ്റങ്ങള് ഇക്കാര്യത്തിലുണ്ടാകാന് എംഎല്എമാരും എംപിമാരും മുന്കൈയെടുക്കണം. സമുദായത്തെ ബാധിക്കുന്ന പല പ്രശ്നങ്ങളും ലോക്സഭയില് ഉന്നയിക്കാന് തനിക്ക് സാധിച്ചിട്ടുണ്ടെന്നും അദ്ദേഹം വ്യക്തമാക്കി.
എംഎല്എ പദവിയുണ്ടെങ്കിലും ഭരണഘടന വിഭാവനം ചെയ്യുന്ന എല്ലാ കാര്യങ്ങളും ചെയ്യുന്നതിന് ആംഗ്ലോ ഇന്ത്യന് പ്രതിനിധികള്ക്ക് പരിമിതികളുണ്ടെന്ന് സ്വീകരണത്തിനു നല്കിയ മറുപടിയില് ജോണ് ഫെര്ണാണ്ടസ് എംഎല്എ വ്യക്തമാക്കി.
മുന് എംപി ഡോ. ചാള്സ് ഡയസ് സമ്മേളനം ഉദ്ഘാടനം ചെയ്തു. യൂണിയന് ഓഫ് ആംഗ്ലോ ഇന്ത്യന് അസോസിയേഷന്സ് പ്രസിഡന്റ് റാല്ഫ് ഫറിയ അധ്യക്ഷനായിരുന്നു. എസ്. ശര്മ എംഎല്എ, ലൂഡീ ലൂയീസ് മുന് എംഎല്എ, ജോസഫ് ഡിസൂസ എന്നിവര് ആശംസ പറഞ്ഞു. അസോസിയേഷന്സ് വൈസ് പ്രസിഡന്റ് ആന്ഡ്രൂ പൊന്സേക സ്വാഗതവും ജനറല് സെക്രട്ടറി മാര്ഷല് ഡിക്കൂഞ്ഞ നന്ദിയും പറഞ്ഞു.
പ്രൊഫഷണല് കോഴ്സുകളില് വിജയം നേടിയവര്ക്ക് പ്രൊഫ. റിച്ചാര്ഡ് ഹെ എംപിയും പത്ത്, പന്ത്രണ്ട് ക്ലാസുകളില് ഉന്നത വിജയം നേടിയ വിദ്യാര്ത്ഥികള്ക്ക് ജോണ് ഫെര്ണാണ്ടസ് എംഎല്എയും പുരസ്കാരങ്ങള് വിതരണം ചെയ്തു.
