മരട്: മദ്യപിച്ച് നെട്ടൂര്- തേവരഫെറി കടത്തു ബോട്ട് ഓടിച്ചിരുന്നയാളെ പനങ്ങാട് പോലീസ് പിടികൂടി. സ്ത്രീകളടക്കമുള്ള യാത്രക്കാര് നെട്ടൂരിലേക്ക് കടക്കാന് സാധിക്കാതെ തേവരഫെറിയില് കുടുങ്ങി. അരൂക്കുറ്റി ചേര്ത്തല സ്വദേശിയായ കിഴക്കേമാട്ടയില് രാജേഷ് (40) ആണ് പിടിയിലായത്. ബോട്ടില് ഇയാള് മെക്കാനിക്കായി വന്നതാണെന്നും ഇടയ്ക്ക് മദ്യപിച്ചു ബോട്ട് ഓടിക്കാറുണ്ടെന്നും പനങ്ങാട് പോലീസ് പറഞ്ഞു. ഇന്നലെ വൈകിട്ട് 6ന് ആയിരുന്നു സംഭവം.
ബോട്ട് ഓടിക്കുന്നത് ലൈസന്സ് ഇല്ലാത്തവരും ഡ്രൈവിങ്ങ് പടിക്കുന്നവരുമാണെന്നും, സന്ധ്യ കഴിഞ്ഞാല് ബോട്ടിനകത്ത് മദ്യപാനികളുടെ വിളയാട്ടമാണെന്നും പരാതി ഉണ്ടായിരുന്നു. ബോട്ടില് ഇതുവരെ സ്ഥിരമായി ഡ്രൈവറില്ല. പകരം ഡ്രൈവിംഗ് അല്പം അറിയാവുന്നവര് മാറിമാറിയാണ് ബോട്ട് ഓടിച്ചത്.
അതേ സമയം തേവര ഫെറിയില് കുടുങ്ങിയ സ്ത്രീകള് അടക്കമുള്ള നെട്ടൂരിലെ യാത്രക്കാരെ കുമ്പളംബോട്ടില് കുമ്പളത്ത് ഇറക്കുകയും ഇവര് റെയില്പാലം കടന്നു നെട്ടൂരെത്തേണ്ടി വന്നതും കൂടുതല് പ്രശ്നങ്ങള്ക്ക് വഴിവെച്ചു. അതിനു ശേഷം പനങ്ങാട് പോലീസും, നഗരസഭ അതികൃതരും തേവരഫെറിയില് കുടുങ്ങി പോയ യാത്രക്കാരെ ഇക്കരെ എത്തിക്കുന്നതിനുള്ള സംവിധാനങ്ങള് ഒരുക്കി.
കൗണ്സിലര്മാരായ ബോബന് നെടുംപറമ്പില്, ജിന്സണ് പീറ്റര്, പി.ജെ. ജോണ്സണ്, ജബ്ബാര് പാപ്പന തുടങ്ങി മറ്റുള്ള കൗണ്സിലര്മാര് എത്തിയിട്ടും തൊട്ടടുത്തു താമസിക്കുന്ന ഡിവിഷന് കൗണ്സിലര് വി.ജി. ഷിബു എത്താത്തതില് പരിസരവാസികളും, യാത്രക്കാരും പ്രതിഷേധിച്ചു. കൗണ്സിലറുടെ ഒത്താശയാണ് ഇതിനൊക്കെ കാരണമായത് എന്നും ക്ഷുഭിതരായ ജനങ്ങള് പറഞ്ഞു.
