ചൈനയിലെ ഒരു വീട്ടമ്മ തന്റെ പൂന്തോട്ടത്തില് നിന്നുള്ള ആ കാഴ്ച്ച കണ്ട് ഞെട്ടി! ഒന്നു കൂടി സൂക്ഷിച്ച് നോക്കി, താന് കണ്ടത് ശരിയാണെന്ന് ഉറപ്പ് വരുത്തിയ അവര്ക്ക് കരയണമോ ശബ്ദമുണ്ടാക്കണമോ എന്ന് അറിയാത്ത അവസ്ഥയായി.
തന്റെ കണ്ണുകള്ക്ക് വിശ്വസിക്കാന് കഴിയാത്ത അവസ്ഥയില് ചൈനയിലെ വീട്ടമ്മയായ മിസിസ് ഫാന് കണ്ട കാഴ്ച്ച എന്താണെന്നോ? തന്റെ വീട്ട് മുറ്റത്തെ പൂന്തോട്ടത്തില് ഒരു മുതലയെയാണ് അവര് കണ്ടത്!
ഇതെവിടെ നിന്ന് പൊട്ടി മുളച്ചു, അതോ ആകാശത്ത് നിന്ന് വീണതോ എന്ന് ചിന്തിച്ച് തലപുകച്ച അവര്ക്ക് അധികം വൈകാതെ അതിന് ഉത്തരം ലഭിച്ചു. അയല്ക്കാരിയാണ് മിസിസ് ഫാനിന് ആ രഹസ്യം പറഞ്ഞു കൊടുത്തത്. അപ്പാര്ട്ട്മെന്റിന്റെ അഞ്ചാം നിലയിലുള്ളവര് മുതലയെ വളര്ത്തുന്നുണ്ട്!
ചൈനയിലെ സിച്ചുവാന് പ്രവിശ്യയിലെ സിങ്കോങ് നഗരത്തിലാണ് മിസിസ് ഫാനിന്റെ വീട്. ആഗസ്റ്റ് 20 ന് ഏകദേശം വൈകിട്ടോടെ ഫാന് തന്റെ വീടിനകത്തിരിക്കുമ്പോള് എന്തോ വലിയ ശബ്ദം കേട്ടിരുന്നു. എന്നാല് അത് വലിയ കാര്യമാക്കാതിരുന്ന ഫാന് തൊട്ടടുത്ത ദിവസമാണ് തന്റെ മുറ്റത്തെ പൂന്തോട്ടത്തില് മുതലയെ കണ്ട് അമ്പരന്നത്.
അഞ്ചാം നിലയില് താമസിക്കുന്നവരുടെ അപ്പാര്ട്ട്മെന്റില് നിന്ന് താഴത്തെ നിലയില് താമസിക്കുന്ന ഫാനിന്റെ വീട്ട് മുറ്റത്തേയ്ക്ക് മുതല വീഴുകയായിരുന്നു. പൂന്തോട്ടത്തില് സ്ഥാപിച്ചിരുന്ന പ്ലാസ്റ്റിക്ക് ഷെഡില് വീണതിന് ശേഷം താഴേയ്ക്ക് വീണത് കൊണ്ട് മുതലയ്ക്ക് പരിക്കുകളൊന്നുമില്ല. മുതലയ്ക്ക് ഏകദേശം മൂന്ന് അടിയോളം നീളമുണ്ട്.
ചൈനയിലെ വന്യജീവി സംരക്ഷണ നിയമ പ്രകാരം മുതലകളെ വളര്ത്തുന്നത് തെറ്റാണ്. അത്തരത്തില് മുതലകളെ പാര്പ്പിക്കണമെന്ന് ആഗ്രഹമുള്ളവര് അതിനായി ലൈസന്സ് സ്വന്തമാക്കേണ്ടതുണ്ട്.
