ഡോ അജയകുമാറിനെ ടി.വി ഉണ്ണികൃഷ്ണന് സ്വീകരിക്കുന്നു
മുഴുവന് ഗ്രാമങ്ങളിലും പിന്നാക്ക പ്രദേശങ്ങളിലും ഇന്റര്നെറ്റ് സൗകര്യം എത്തിക്കണമെന്ന് ഇലക്ട്രോണിക്സ് ആന്റ് ഐടി വകുപ്പ് അഡീഷണല് സെക്രട്ടറി ഡോ. അജയ്കുമാര്. അട്ടപ്പാടിയും വയനാടുമുള്പ്പെടെ ഡിജിറ്റല് ഇന്ത്യയുടെ ഭാഗമാകണം. ജന്മഭൂമി കോണ്ക്ലേവില് ‘കേരളത്തിലെ ഐടി വികസനം’ എന്ന വിഷയത്തില് സംസാരിക്കുകയായിരുന്നു അദ്ദേഹം. രാജ്യത്തിന്റെ ആഭ്യന്തര ഉത്പാദനത്തില് ഐടി രംഗം നിര്ണായകമാണ്.
പത്ത് ശതമാനം ഇന്റര്നെറ്റ് വളര്ച്ച ആഭ്യന്തര ഉത്പാദനത്തില് 1.25 ശതമാനം വര്ദ്ധനവുണ്ടാക്കുന്നുവെന്ന് പഠനങ്ങള് പറയുന്നു. ഐടി രംഗത്തെ അടിസ്ഥാനസൗകര്യവികസനം രാജ്യത്തിന്റെ ഉത്പാദനം വര്ദ്ധിപ്പിക്കുന്നു. അതിനാല് കേരളത്തിന്റെ വികസനത്തിനും അത്യന്താപേക്ഷിതമാണ് ഐടി രംഗത്തെ വളര്ച്ച. ഐടി പദ്ധതികള് ഏറെയുണ്ടെങ്കിലും ഫലം പൂര്ണമായും ലഭിക്കുന്നില്ല.
അപേക്ഷകള് ഓണ്ലൈനായി നല്കിയാലും തുടര്നടപടികള്ക്ക് ജനങ്ങള്ക്ക് ഓഫീസില് നേരിട്ട് ഹാജരാകേണ്ടി വരുന്നു. ഇത് മാറണം. എല്ലാവരിലേക്കും പദ്ധതിയുടെ ഗുണം എത്തിക്കാന് സാധിക്കണം.
ഒരു പദ്ധതി ഓണ്ലൈനായി നടപ്പാക്കുമ്പോള് ഒരാള്പോലും ഒഴിവാക്കപ്പെടുന്നില്ലെന്ന സ്ഥിതിയുണ്ടാകണം. ഇ പെയ്മെന്റ്, ഡിജിറ്റല് ലോക്കര്, ഓണ്ലൈനായി ഒരാളെ തിരിച്ചറിയാനുള്ള സംവിധാനം എന്നിവയ്ക്ക് ഊന്നല് നല്കണം. കേരളത്തില് നിരവധി ഡിജിറ്റല് പദ്ധതികള് നടപ്പാക്കിയിട്ടുണ്ട്. അക്ഷയ പദ്ധതി ആദ്യമായി നടപ്പിലാക്കിയത് കേരളമാണ്.
ഒപ്റ്റിക്കല് ഫൈബര് കേബിളിലൂടെ കേരളത്തിലെ പഞ്ചായത്തുകള് ബന്ധിക്കപ്പെട്ടിരിക്കുന്നു. ഐടി അറ്റ് സ്കൂള്, ഇ ഡിസ്ട്രിക്ട് പദ്ധതി എന്നിവയും കേരളത്തില് നടപ്പിലാക്കുന്നുണ്ട്. ഡിജിറ്റല് ടെക്നോളജിയിലൂടെ ശാക്തീകരിക്കപ്പെട്ട സമൂഹമാണ് ഡിജിറ്റല് ഇന്ത്യയിലൂടെ മോദി ലക്ഷ്യമിടുന്നത്. കേരളം സാധ്യതകള് പൂര്ണമായും ഉപയോഗപ്പെടുത്തണം.
