ചവറ: ഗ്രാമപഞ്ചായത്ത് അംഗത്തെ ആക്രമിച്ച സംഭവത്തില് പിടിയിലായ പ്രതികള് പോലീസ് ജീപ്പില് നിന്നും രക്ഷപെട്ടു. ചവറ ഗ്രാമപഞ്ചായത്ത് അംഗം ദീപുവിനെയാണ് ഒരു സംഘം കഴിഞ്ഞ ദിവസം രാത്രിയില് അക്രമിച്ചത്. സംഭവത്തെപറ്റി പോലിസ് പറയുന്നത് ഇങ്ങനെ;
ഞായറാഴ്ച വൈകിട്ട് കൊറ്റംകുളങ്ങര ക്ഷേത്രകുളത്തിന് സമീപം നിന്നിരുന്ന ദീപുവിനോട് അക്രമത്തിലെ പ്രധാന പ്രതി വിനീത് എന്നയാള് എത്തി ബൈക്ക് ആവശ്യപ്പെട്ടു. മദ്യപിച്ചതിനാല് ഇയാള്ക്ക് ബൈക്ക് നല്കാന് മെമ്പര് തയാറായില്ല. തുടര്ന്ന് ഇവിടെ ബൈക്ക് വച്ചിട്ട് ദീപു ടൈറ്റാനിയം ജംഗ്ഷനില് പോയി മടങ്ങി എത്തുമ്പോള് ബൈക്ക് തല്ലിതകര്ത്ത നിലയില് കാണപ്പെടുകയായിരുന്നു. തുടര്ന്ന് പഞ്ചായത്ത് ഓഫീസിന് സമീപം നിന്നിരുന്ന ദീപുവിനെ വിനീത്, സുധീഷ്കുമാര് എന്നിവരടങ്ങുന്ന സംഘം അക്രമിക്കുകയായിരുന്നു.
സംഭവമറിഞ്ഞ് സിപിഎം പ്രവര്ത്തകര് കൂടിയതോടെയാണ് പോലീസെത്തി പ്രതികളെ പിടികൂടി ജീപ്പില് കയറ്റി സ്റ്റേഷനിലേക്ക് കൊണ്ടുപോകാന് ശ്രമിക്കുന്നതിനിടെയാണ് ഇരുവരും രക്ഷപെട്ടത്. പഞ്ചായത്ത് അംഗത്തിന്റെ പരാതിയെ തുടര്ന്ന് പോലീസ് കേസെടുത്ത് അന്വേഷണം ആരംഭിച്ചതായി എസ്.ഐ ജയകുമാര് അറിയിച്ചു.
