ആലപ്പുഴ: ദശാബ്ദങ്ങള് പഴക്കമുള്ള പാലത്തില് തറയോട് പാകിയത് ഉദ്ഘാടനം ചെയ്യാന് പോലും രണ്ടു മന്ത്രിമാര് എത്തിയത് പരിഹാസ്യമായി. മന്ത്രിമാരുടെ സൗകര്യത്തിനായി പണി പൂര്ത്തിയായിട്ടും ദേശീയപാത രണ്ട് ദിവസം അധികം അടച്ചിട്ട് ജനങ്ങളെ ദുരിതത്തിലാക്കി.
ഇന്നലെ രാവിലെയാണ് ഏറെ കൊട്ടിഘോഷിച്ച് ശവക്കോട്ട പാലത്തില് തറയോട് പാകിയതിന്റെ ഉദ്ഘാടനം മന്ത്രി തോമസ് ഐസക്ക് നിര്വഹിച്ചത്. മന്ത്രി ജി. സുധാകരന് സാക്ഷ്യം വഹിക്കുകയും ചെയ്തു. ദേശീയ പാതയില് ഇന്റര്ലോക്ക് ടൈല്സ് പാകുന്നത് പൊതുമരാമത്ത് വകുപ്പ് ആഘോഷമാക്കി മാറ്റുകയാണ്. റോഡിലെ കുഴികള് ഇതു വരെ അടച്ച് ഗതാഗതയോഗ്യമാക്കാന് കഴിയാത്ത സര്ക്കാര് കുഴിയടപ്പിന്റെ ഉദ്ഘടനം ആഘോഷമായി നടത്തുന്നത് പരിഹാസ്യമാണെന്നാണ് ആക്ഷേപം ഉയരുന്നത്. ഇന്റര്ലോക്ക് ടൈല്സ് പാകുന്നതിന്റെ പേരില് ദേശീയപാത പാതിരപ്പള്ളി മുതല് ആലപ്പുഴ ടൗണ് വരെ ഒരാഴ്ചയിലേറെയാണ് അടച്ചിട്ടത്. പണി തീര്ന്നാലുടന് തുറന്ന് കൊടുക്കുമെന്നാണ് അറിയിച്ചിരുന്നത്. പക്ഷേ പണി രണ്ട് ദിവസം മുന്പേ തീര്ന്നിട്ടും മന്ത്രിമാരുടെ ഉദ്ഘാടന സൗകര്യത്തിനായി ദേശിയപാത അടച്ചിട്ടു.
വൈറ്റില മുതല് ആലപ്പുഴ വരെ നൂറു കണക്കിന് കണ്ടെയ്നര് ലോറികളാണ് വഴിയില് കുടുങ്ങിയത്. ആയിരക്കണക്കിന് വാഹനങ്ങളാണ് ചെറിയ റോഡുകളിലൂടെ വഴി തിരിച്ചു വിട്ടത്്. വഴി തിരിച്ചു വിട്ട് വാഹനങ്ങള് കടത്തി വിടാത്ത അഞ്ച് കിലോമീറ്റര് ദേശീയപാത മുഴുവന് പൊളിഞ്ഞതാണ്. അത് ശരിയാക്കാന് തയ്യാറായില്ല എന്ന് മാത്രമല്ല മന്ത്രിമാരുടെ സൗകര്യത്തിനായി ജനങ്ങളെ ബന്ധിയാക്കുന്ന ഗതികേടും ഉണ്ടായി. പുതിയ പാലംപണിയല്ല, ദശാബ്ദങ്ങള് പഴക്കമുള്ള പാലത്തില് ടൈല്സിടുന്നതിനാണ് രണ്ട് മന്ത്രിമാരുടെ വക ആഘോഷം അരങ്ങേറിയത്.
