മട്ടന്നൂര്: കണ്ണൂര് അന്താരാഷ്ട്ര വിമാനത്താവള പദ്ധതി പ്രദേശത്തുനിന്ന് കഴിഞ്ഞ ദിവസങ്ങളിലുണ്ടായ കനത്ത മഴയില് വന്തോതില് മഴവെള്ളം കുത്തിയൊഴുകിവന്ന് അടിഞ്ഞ് കൂടിയ ചെളി നീക്കം ചെയ്യാത്തതില് പ്രതിഷേധിച്ച് ചെളിയുമായി നാട്ടുകാര് കിയാല് ഓഫീസിലേക്ക് മാര്ച്ച് നടത്തി. ഇന്നലെ കാലത്താണ് ഒഴുകിവന്ന ചളിയുമായി കാര കല്ലേരിക്കര പ്രദേശ വാസികള് കിയാല് ഓഫീസിലെത്തി പ്രതിഷേധിച്ചത്. ബക്കറ്റില്കൊണ്ടുവന്ന ചെളി ഓഫീസിനകത്ത് ഒഴിച്ചായിരുന്നു പ്രതിഷേധം. വൈകുന്നേരത്തോടെ കൂടുതല് ജീവനക്കാരെ ഉള്പ്പെടുത്തി വെള്ളം ഒഴുകിപ്പോകുവാനുള്ളസംവിധാനം ഒരുക്കുമെന്ന ഉറപ്പിനെ തുടര്ന്ന് ജനകീയ സമിതിയുടെ നേതൃത്വത്തിലുള്ളസമരക്കാര് പിരിഞ്ഞുപോവുകയായിരുന്നു. ഇക്കഴിഞ്ഞ ജനുവരിയില് വിമാനത്താവള പദ്ധതി പ്രദേശത്തുനിന്ന് കല്ല് ശേഖരിക്കുന്നതിനായി നടത്തിയ അതിശക്തമായ സ്ഫോടനത്തില് ക്ഷതം സംഭവിച്ച വീടുകള്ക്ക് പോലും ഇതുവരെ പൂര്ണ്ണമായി നഷ്ടപരിഹാരം നല്കുവാന് അധികൃതര് തയ്യാറായിട്ടില്ല. സ്ഥലം എംഎല്എയും മന്ത്രിയുമായ ഇ.പി.ജയരാജന് പ്രശ്നങ്ങള്ക്ക് അടിയന്തിരമായി പരിഹാരം കണ്ടെത്തുമെന്ന് നാട്ടുകാര്ക്ക് ഉറപ്പുനല്കിയിരുന്നുവെങ്കിലും ഇത് നടപ്പിലാക്കാന് കഴിയാത്തത് നാട്ടുകാരില് കടുത്ത പ്രതിഷേധത്തിന് കാരണമായിട്ടുണ്ട്.
വിമാനത്താവള പ്രദേശത്തെ ചെളി നീക്കാത്തതില് പ്രതിഷേധിച്ച് നാട്ടുകാര് ചെളിയുമായി മാര്ച്ച് നടത്തി
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.