ചാരുംമൂട്: ഗുരുദേവനെ ചിലര് സൗകര്യപൂര്വ്വം ഹൈജാക്ക് ചെയ്യുകയാണെന്ന് വെള്ളാപ്പള്ളി നടേശന്. പന്തളത്ത് എസ്എന്ഡിപി യൂണിയന്റെ നേതൃത്വത്തില് നടന്ന ഗുരുസ്തവത്തിന്റെ ശതാബ്ദി ആഘോഷചടങ്ങ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഗുരുദേവപ്രസ്ഥാനത്തെ അവഗണിക്കാന് ആര്ക്കും കഴിയില്ല. ഗുരുവിന്റെ മഹത്വം വലുതാണ്. അത് ഉള്ക്കൊള്ളാന് കേരളം വൈകി. ഈഴവര്മാത്രമായിരുന്നു ഗുരുദേവന്റെ മഹത്വം പ്രചരിപ്പിക്കാനുണ്ടായിരുന്നത്. ഇപ്പോള് രാഷ്ട്രീയക്കാരുള്പ്പെടെ എല്ലാവരും ഇത് പ്രചരിപ്പിക്കാന് മത്സരിക്കുകയാണ്.
ജാതിവ്യവസ്ഥ ഇന്ത്യന് ഭരണഘടന അംഗീകരിച്ചതാണ്. കേരള നിയമസഭയില് 16 എംഎല്എമാര് ജാതി സംവരണത്തിന്റെ അടിസ്ഥാനത്തില് മാത്രം വരുന്നതാണ്. ജാതി പറയരുത് ചോദിക്കരുത് എന്ന് പ്രചരിക്കുന്നവര് ഇതിന് മറുപടി പറയണമെന്നും അദ്ദേഹം പറഞ്ഞു.
ഗുരുദര്ശനത്തിലെ ഒരു വാക്ക് മാത്രം അടര്ത്തിയെടുത്താണ് ജാതി പറയരുതെന്ന് ഗുരുപറഞ്ഞതായി ചിലര് പ്രചരിക്കുന്നത്. ഗുരുവിന്റെ ദര്ശനങ്ങള് അന്ധന് ആനയെ കണ്ടപോലെയാണ് ഇക്കൂട്ടര് വ്യാഖ്യാനിക്കുന്നത്. ജാതി വിവേചനമാണ് ജാതി ചിന്തയുണ്ടാക്കുന്നത്.ജാതിയുടെ പേരില് ആരുടേയും പിടിച്ചുപറിക്കാനില്ല. മറ്റുള്ളവര്ക്ക് നല്കുന്നതോടൈപ്പം ഈഴവ സമൂഹത്തിനും അര്ഹമായത് ലഭിക്കണമെന്നു മാത്രമാണ് എസ്എന്ഡിപി നിലപാടെന്നും അദ്ദേഹം പറഞ്ഞു. പന്തളം യൂണിയന് പ്രസിഡന്റ് അഡ്വ.സിനില് മുണ്ടപ്പള്ളി അധ്യക്ഷനായിരുന്നു.
