കണ്ണൂര് : സിബിഎസ്സി സിലബസ് പ്രകാരം പൊതുപരീക്ഷ എഴുതിയ വിദ്യാര്ത്ഥികള്ക്ക് പത്താംതരത്തിലും പ്ലസ്ടുവിലുള്ള തുടര്പഠനത്തിന് ഏകജാലക പ്രവേശനത്തിന്റെ സമയത്ത് പത്ത് മാര്ക്ക് കുറച്ചുകൊണ്ട് വിദ്യാര്ത്ഥികളുടെ തുടര്പഠന സാധ്യതകളെ ഇല്ലാതാക്കുന്ന വിദ്യാഭ്യാസ വകുപ്പിന്റെ നടപടി വിദ്യാര്ത്ഥികളോട് കാണിക്കുന്ന വഞ്ചനയാണെന്ന് കേരള സ്റ്റേറ്റ് പ്രൈവറ്റ് സ്കൂള് അസോസിയേഷന് കോഡിനേഷന് കമ്മറ്റി ചൂണ്ടിക്കാട്ടി.
കേരളത്തിലെ വിദ്യാഭ്യാസരംഗത്ത് ഉന്നത നിലവാരം പുലര്ത്തുന്ന വിദ്യാര്ത്ഥികളെ രണ്ടാംതരം പൗരന്മാരായി കാണുന്ന രീതി കേരളത്തിന്റ ഉന്നത വിദ്യാഭ്യാസത്തെ നിലവാരമില്ലാതാക്കിമാറ്റും. അണ്-എയ്ഡഡ് മേഖലയില് പഠിക്കുന്ന പത്ത് ലക്ഷത്തോളം വിദ്യാര്ത്ഥികളുടെ ഭാവിയെ ബാധിക്കുന്ന ഈ നിലപാടില് നിന്നും പിന്തിരിയണമെന്ന് കേരള പ്രൈവറ്റ് സ്കൂള് അസോസിയേഷന് കോര്ഡിനേഷന് സംസ്ഥാന നിര്വ്വാഹക സമിതിയോഗം സര്ക്കാരിനോട് ആവശ്യപ്പെട്ടു.
സംസ്ഥാന പ്രസിഡണ്ട് പി.പി.യൂസഫലിയുടെ അധ്യക്ഷതയില് ചേര്ന്ന യോഗത്തില് ആര്.കെ.നായര്, കെ.കെ.അബ്ദുള്ഖാദര്, സുന്ദരേശനുണ്ണി, രാമദാസ് കതിരൂര് തുടങ്ങിയവര് പ്രസംഗിച്ചു.
