കണ്ണൂര്‍: അഞ്ഞൂറു കിലോഗ്രാം തൂക്കമുള്ള കാറുയര്‍ത്താന്‍ കുഞ്ഞുകൈകള്‍ക്കുമാവും. ഉത്തോലക തത്വമനുസരിച്ച് പ്രവര്‍ത്തിക്കുന്ന ഉപകരണം വേണമെന്ന് മാത്രം. തത്വങ്ങളുടെ ശാസ്ത്രീയവശങ്ങള്‍ ഇനി കണ്ണൂര്‍ സയന്‍സ് പാര്‍ക്കില്‍ നിന്ന് നേരിട്ടറിയാം.
ഉത്തോലക തത്വം അനുസരിച്ച് പ്രവര്‍ത്തിക്കുന്ന ജയന്റ് ലിവര്‍, ആവശ്യമുള്ളിടത്ത് ജലമെത്തിക്കുന്നതിനുള്ള ആര്‍ക്കമിഡീസ് സ്‌ക്രൂ എന്നീ രണ്ടു ഉപകരണങ്ങള്‍ കൂടി സയന്‍സ് പര്‍ക്കിലെത്തി. മലപ്പുറം സിഡ്‌കോ വഴി കൊണ്ടോട്ടിയിലെ സ്‌റാങ്ക് ഇന്‍ജിനിയറിങ്ങാണ് ഉപകരങ്ങള്‍ സ്ഥാപിക്കുന്നത്. പത്തുലക്ഷം രൂപ ചെലവിലാണ് പുതിയ സംവിധാനമൊരുക്കിയത്.
ഉത്തോലകതത്വ പ്രകാരം ഭാരമേറിയ വസ്തുക്കള്‍ ഉയര്‍ത്താന്‍ വളരെ എളുപ്പത്തിലും വേഗത്തിലും കഴിയുന്നതാണ് ജയന്റ് ലിവര്‍ ഉപകരണം. ഭീമന്‍ക്രയിനുകളുടെ പ്രവര്‍ത്തിക്കുന്നത് ഉത്തോലക തത്വമനുസരിച്ചാണ്. ഇവയുടെ ശാത്രീയവശങ്ങള്‍ വിശദീകരിക്കാനാണ് സയന്‍സ് പാര്‍ക്കില്‍ ജയന്റ് ലിവര്‍ സ്ഥാപിച്ചത്.
ആര്‍ക്കമിഡീസിന്റെ തത്വമനുസരിച്ച് പഴയകാലത്ത് കൃഷിയിടങ്ങളിലേക്ക് വെള്ളമെത്തിക്കുന്നതിനുള്ള ഉപകരത്തിന്റെ ശാസത്രീയത വിശദീകരിക്കുന്നതാണ് ആര്‍ക്കമിഡീസ് സ്‌ക്രൂ. ഉപകരണങ്ങള്‍ പ്രവര്‍ത്തന സജ്ജമായിട്ടുണ്ട്. ഇന്ന് മുതല്‍ സയന്‍സ് പാര്‍ക്കിലെത്തുന്നവര്‍ക്കു മുന്നില്‍ പ്രദര്‍ശിപ്പിക്കും.
