വിളപ്പില്: കുടുംബ ബന്ധങ്ങള് ശിഥിലമായതാണ് ഈ നൂറ്റാണ്ടിന്റെ ശാപമെന്ന് ശിവഗിരിമഠം കുന്നംപാറ ക്ഷേത്രം സെക്രട്ടറി സ്വാമി ബോധിതീര്ത്ഥ. വിളപ്പില്ശാലയില് ഗുരുധര്മ്മ പ്രചരണസഭയുടെ യൂണിറ്റ് ഉദ്ഘാടനം ചെയ്ത് സംസാരിക്കുകയായിരുന്നു അദേഹം.
കാലത്തിന്റെ കുതിച്ചുചാട്ടത്തില് മനുഷ്യന് നഷ്ടമായത് ബന്ധങ്ങളുടെ മൂല്യവും സഹജീവി സ്നേഹവുമാണ്. അണുകുടുംബങ്ങളിലേക്ക് അവന് ഒതുങ്ങികൂടിയപ്പോള് ആചാരങ്ങളും അനുഷ്ഠാനങ്ങളും അന്യമായി. ഗുരുദേവന് അരുള്ചെയ്ത ധര്മ്മ ജീവിതം കൈമോശം വന്നു. ഗുരുദേവ സ്വരൂപത്തെ ആചരിക്കുവാനും ആശയങ്ങള് പ്രചരിപ്പിക്കുവാനും ശിവഗിരി മഠം മേല്നോട്ടം വഹിക്കുന്ന ഗുരുധര്മ്മ സഭയ്ക്ക് കഴിയണമെന്നും അദേഹം പറഞ്ഞു. പരസ്പരം കലഹിക്കാനും അധര്മ്മങ്ങള് ചെയ്യുവാനുമുള്ളതല്ല ജീവിതം. അത് പരസ്പരം അറിയാനും മറ്റുള്ളവര്ക്ക് മാതൃകയാവാനുമുള്ളതാണ്. ആചാര്യന്മാരാല് അനുഗ്രഹീതരാണ് നാം ഓരോരുത്തരും ആര്ഷഭാരത സംസ്കൃതിയില് പിറന്നവര്. ആ ബോധമാകണം നമ്മെ നയിക്കേണ്ടതെന്നും അദേഹം അഭിപ്രായപ്പെട്ടു.
ഗുരുധര്മ്മസഭ യൂണിറ്റ് പ്രസിഡന്റ് വിശ്വദേവ് അദ്ധ്യക്ഷത വഹിച്ചു. ഐ.ബി. സതീഷ് എംഎല്എ, സജീവ് കൃഷ്ണന്, വിളപ്പില് പഞ്ചായത്ത് പ്രസിഡന്റ് വിജയരാജ്, എസ്എന്ഡിപി യോഗം ഭാരവാഹികളായ ഡോ. സുശീല, വിജയകുമാര്, മാധുരി സജീവ്, പാച്ചല്ലൂര് വിജയന്, സജീവ് രാംദേവ്, ബിന്ദു സജീവ് തുടങ്ങിയവര് സംസാരിച്ചു.
