ആലപ്പുഴ: ആലപ്പുഴ നഗരത്തിലേക്ക് വരു…., പൊതു റോഡുകള് വില്ക്കുന്നവരെയും വാടകയ്ക്ക് നല്കുന്നവരെയും കാണാം, അന്നന്നത്തെ ഉപജീവനത്തിന് വേണ്ടി റോഡുകയ്യേറി കച്ചവടം നടത്തുവരെ മറയാക്കി ഇത്തരത്തില് റോഡുകള് വിപണന കേന്ദ്രമാക്കി ലക്ഷങ്ങള് കൊയ്യുന്ന മാഫിയാ സംഘങ്ങള് വിലസുകയാണ്.
പലപ്പോഴും മതത്തെ പോലും കൂട്ടുപിടിക്കാനും ഇക്കൂട്ടര് തയ്യാറാകുന്നു. അതിനാല് തന്നെ രാഷ്ട്രീയക്കാരുടെ പിന്തുണയും ഇവര്ക്ക് ലഭിക്കുന്നു. പ്രധാന ജങ്ഷനുകളില് റോഡു കയ്യേറി കച്ചനടം നടത്തും. പിന്നീട് ഈ സ്ഥലം മറിച്ചു വില്ക്കുകയോ, വാടകയ്ക്ക് നല്കുകയോ ചെയ്താണ് ഇവര് നേട്ടം ഉണ്ടാക്കുന്നത്.
പൊതു റോഡുകള് വിറ്റും, വാടകയ്ക്ക് നല്കിയും മാഫിയകള് നേട്ടം ഉണ്ടാക്കുമ്പോള് യാത്രക്കാരുടെ ദുരിതം വര്ദ്ധിക്കുകയാണ്. നഗരത്തിലെ ഫുട്പാത്തുകള് കച്ചവട കേന്ദ്രങ്ങളായി മാറി, അധികാരികള് കാഴ്ചക്കാര്, യാത്രാകേശം രൂക്ഷം, കയ്യേറ്റക്കാര്ക്ക് പിന്തുണ രാഷ്ട്രീയപാര്ട്ടികള്. മാസങ്ങള്ക്ക് മുമ്പ് നഗരസഭ ഒഴിപ്പിച്ച വഴിയോര കച്ചവടം വീണ്ടും സജീവമായിക്കഴിഞ്ഞു.
ഒഴിപ്പിക്കലുമായി ബന്ധപ്പെട്ട് ഉദ്യോഗസ്ഥരുടെ ശമ്പള ഇനത്തിലും യന്ത്രങ്ങളുടെ വാടകയിനത്തിലും പതിനായിരങ്ങളാണ് നഗരസഭയ്ക്ക് ചിലവായത്. പൊതുജനങ്ങളുടെ നികുതിയില് നിന്നുള്ള പണം ഉപയോഗിച്ച് ഫുട്പാത്തുകളിലെ കച്ചവടവും വ്യാപാര സ്ഥാപനങ്ങളില് നിന്ന് ഫുട്പാത്തുകളിലേക്കു നിര്മിച്ച ഇറക്കുകളും മാറ്റുന്നതിനിടയില് തന്നെ ഇടതുവലതു രാഷ്ടീയപാര്ട്ടികളുടെ സമ്മര്ദ്ദത്തെ തുടര്ന്ന് നഗരസഭ ഒഴിപ്പിക്കല് നടപടികള് നിര്ത്തിവച്ചിരുന്നു.
പിന്നീട് നിയമസഭാ തെരഞ്ഞെടുപ്പിന്റെ തിരക്കായതോടെ ഒഴിപ്പിക്കല് വിസ്മൃതിയിലായി. ഇതോടെ ഒഴിപ്പിച്ച സ്ഥലങ്ങളിലെല്ലാം വ്യാപാര കേന്ദ്രങ്ങള് വീണ്ടുമുയര്ന്നു. എസ്ഡിവി സ്കൂളുകള്ക്കു മുന്നിലെ ഫുട്പാത്തിലൂടെ യാത്രക്കാര്ക്കു സഞ്ചരിക്കാന് കഴിയാത്ത തരത്തില് കടകളില് നിന്നും സാധനങ്ങള് നിരത്തിയിരിക്കുകയാണ്.
തിരക്കേറിയ സമയങ്ങളില്പോലും വിദ്യാര്ഥികളടക്കമുള്ളവര് വീതി കുറഞ്ഞ റോഡിലൂടെ സഞ്ചരിക്കേണ്ടി വരുന്നത് അപകടഭീഷണിയുയര്ത്തുന്നു. നേരത്തെ ഇത്തരത്തില് ഫുട്പാത്തിലൂടെയുള്ള സഞ്ചാരം തടസപ്പെടുത്തുന്ന തരത്തില് കച്ചവടം നടത്തുന്നത് സംബന്ധിച്ച് വിദ്യാര്ഥികള് ജില്ലാ കളക്ടര്ക്ക് നേരിട്ട് പരാതി നല്കിയതിന്റെ കൂടിയടിസ്ഥാനത്തിലായിരുന്നു ഒഴിപ്പിക്കല് നടപടികള് നടത്തിയത്.
