ദക്ഷിണാഫ്രിക്കയിലെ പ്രിട്ടോറിയയിലെത്തിയ പ്രധാനമന്ത്രി നരേന്ദ്ര മോദിയെ
വരവേല്ക്കുന്ന ദക്ഷിണാഫ്രിക്കന് പ്രസിഡന്റ് ജേക്കബ് സുമ
ന്യൂദല്ഹി/ജോഹന്നാസ്ബെര്ഗ്: ഭാരതത്തിന്റെ എന്എസ്ജി അംഗത്വത്തിന് ദക്ഷിണാഫ്രിക്ക പിന്തുണ പ്രഖ്യാപിച്ചു. പ്രധാനമന്ത്രി നരേന്ദ്രമോദിയുടെ ദ്വിദിന സന്ദര്ശനത്തോടനുബന്ധിച്ചു നടത്തിയ ചര്ച്ചകള്ക്കൊടുവിലാണ് ദക്ഷിണാഫ്രിക്ക ഭാരതത്തിന് പിന്തുണ നല്കിയത്. കഴിഞ്ഞമാസം നടന്ന എന്എസ്ജി യോഗത്തില് ചൈനയ്ക്കൊപ്പം ഭാരതത്തിന്റെ അംഗത്വത്തെ എതിര്ത്ത പ്രമുഖ രാജ്യമാണ് ദക്ഷിണാഫ്രിക്ക.
ഭാരതത്തിന്റെ എന്എസ്ജി അംഗത്വത്തെ പിന്തുണച്ച ദക്ഷിണാഫ്രിക്കന് നടപടിയെ ഭാരത പ്രധാനമന്ത്രി നരേന്ദ്രമോദി അഭിനന്ദിച്ചു. ദക്ഷിണാഫ്രിക്കന് പ്രസിഡന്റ് ജേക്കബ് സുമയ്ക്ക് നന്ദി പറഞ്ഞ മോദി ദക്ഷിണാഫ്രിക്കയുടെ പിന്തുണ വിലമതിച്ചതാണെന്നും പറഞ്ഞു. ദക്ഷിണാഫ്രിക്കന് ഭരണ തലസ്ഥാനമായ പ്രിട്ടോറിയയില് നടന്ന രാഷ്ട്രത്തലവന്മാരുടെ കൂടിക്കാഴ്ചയില് ഭീകരവാദം ഉള്പ്പെടെയുള്ള കാര്യങ്ങളില് യോജിച്ച് പ്രവര്ത്തിക്കാനും തീരുമാനമായി.
ആഗോള തലത്തിലും തദ്ദേശീയമായും ഉയര്ന്നുവരുന്ന ഭീകരവാദ പ്രവര്ത്തനങ്ങളെ യോജിച്ച് നേരിടാന് മോദിയും ജേക്കബ് സുമയും തമ്മില് നടത്തിയ കൂടിക്കാഴ്ചയില് തീരുമാനമായി. ഗോവയില് നടക്കുന്ന ബ്രിക്സ് സമ്മിറ്റിലേക്ക് ദക്ഷിണാഫ്രിക്കന് പ്രസിഡന്റിനെ മോദി ക്ഷണിച്ചു.
ആഗോളതലത്തില് വര്ദ്ധിച്ചുവരുന്ന വെല്ലുവിളികള് നേരിടുന്നതില് ഇരുരാജ്യങ്ങളും യോജിച്ചു പ്രവര്ത്തിക്കുമെന്ന് ഇരു രാഷ്ട്രത്തലവന്മാരുടേയും കൂടിക്കാഴ്ചയ്ക്ക് ശേഷം പുറത്തിറക്കിയ സംയുക്ത പ്രസ്താവന വിശദീകരിക്കുന്നു.
വ്യാവസായിക ബന്ധങ്ങള് ദൃഢമാക്കി സാമ്പത്തിക നേട്ടങ്ങളുണ്ടാക്കാന് ശ്രമിക്കും. മേഖലയിലേയും ആഗോളതലത്തിലെയും മികച്ച സാമ്പത്തിക ശക്തികളായി ഉയരാനാണ് ഇരുരാജ്യങ്ങളുടേയും ശ്രമം. വംശീയതയ്ക്കും കോളനിവാഴ്ചയ്ക്കും എതിരായി ഒരുമിച്ചു നിന്ന രാജ്യങ്ങളാണ് ഭാരതവും ദക്ഷിണാഫ്രിക്കയും. ഗാന്ധിജി ഭാരതത്തിനും ദക്ഷിണാഫ്രിക്കയ്ക്കും ഒരേപോലെയാണ്, മോദി പറഞ്ഞു.
ഇന്നലെ വൈകിട്ട് നെല്സണ് മണ്ടേല ഫൗണ്ടേഷനില് സന്ദര്ശനം നടത്തിയ മോദി അവിടെ ജനങ്ങളുമായി സംവദിച്ചു. ഇന്ന് താന്സാനിയയിലേക്ക് പോകുന്ന മോദി നാളെ കെനിയയിലും സന്ദര്ശനം നടത്തിയ ശേഷമാകും ദല്ഹിക്ക് മടങ്ങുന്നത്.
