പയ്യന്നൂര്: രക്ഷിതാക്കളും കുട്ടികളും തമ്മിലുള്ള ബന്ധം കുറഞ്ഞ് വരുന്നത് കുട്ടികളുടെ ഭാവിയെയും, ബുദ്ധിപരമായ വളര്ച്ചയെയും ഇല്ലാതാക്കുമെന്ന് ബാലഗോകുലം സംസ്ഥാന കാര്യദര്ശി പി.സ്മിത വത്സന് പറഞ്ഞു. നടുവില് ശ്രീ മൂകാംബിക വിദ്യാലയത്തില് നടന്ന ബാലഗോകുലം പയ്യന്നൂര് ജില്ലാ സമ്മേളനത്തില് സംസാരിക്കുകയായിരുന്നു അവര്. കുട്ടികളുടെ കഴിവുകള് തിരിച്ചറിയാതെ തങ്ങളുടെതായ ലക്ഷ്യത്തിലേക്ക് കുട്ടികളെ തള്ളിവിടുന്ന രക്ഷിതാക്കള് യഥാര്ത്ഥത്തില് അവരുടെ കഴിവുകളെ ഇല്ലാതാക്കുകയാണ് ചെയ്യുന്നത്. ഇതു വഴി ലക്ഷ്യബോധമില്ലാത്ത ഒരു തലമുറ വളര്ന്ന് വരുന്നു. നൂറ് ശതമാനം സാക്ഷരത നേടി എന്നവകാശപ്പെടുന്ന കേരളത്തില് വിദ്യാസമ്പന്നരായ അധ്യാപകര് ഉള്പ്പടെ ആത്മഹത്യചെയ്യുന്നു. മൂല്യാധിഷ്ഠിത വിദ്യാഭ്യാസത്തിന്റെ കുറവാണ് ഇത്തരം ദുരന്തങ്ങളുടെ കാരണമെന്നും അവര് പറഞ്ഞു.
ധീരതയ്ക്കുള്ള രാഷ്ട്രപതിയുടെ പുരസ്കാരം നേടിയ കെ.വി.അഭിജിത്ത് സമ്മേളനം ഉദ്ഘാടനം ചെയതു. ജില്ലാ അധ്യക്ഷന് പി.വി.മനോജ് മാസ്റ്റര് അധ്യക്ഷത വഹിച്ചു. ചടങ്ങില് എസ്എസ്എല്സി, +2 ഉന്നത വിജയികളെ അനുമോദിച്ചു. ടി.ഒ.സുരേഷ് സ്വാഗതവും സജീവന് മാസ്റ്റര് നന്ദിയും പറഞ്ഞു. ഭാരവാഹികളായി പി.വി.മനോജ് മാസ്റ്റര് (രക്ഷാധികാരി), ടി.ഒ.സുരേഷ് (പ്രസിഡന്റ്) പി.രാജീവന് (സെക്രട്ടറി) എം.എം.ഗോവിന്ദന് (സംഘടനാ കാര്യദര്ശി) പി.രഞ്ജിത്ത് (ട്രഷറര്) അനിത വിജയന് (ഭഗിനി പ്രമുഖ) എന്നിവരെ തെരഞ്ഞെടുത്തു.
